Алатай 2019-йисуз зегьметда, яратмишунра, ийизвай къуллугърин рекьерай кьетIен агалкьунар хьайи, чпиз государстводи ва общественностди чIехи тIварар, шабагьар гайи ва и кардалди хайи халкьдин, Ватандин тIвар машгьурай вири рухвайризни рушариз аферин!
Чна абуруз Аяз Бубадин тIварунихъай цIийи тебрикар рекье твазва. Шак алай кар туш, чи халкьдин векилрикай Ватандин жуьреба-жуьре пипIера кьетIен агалкьунар къазанмишай вирибурун тIварар чаз чир хьанвач, абурун кьадар гьар йисуз гзаф я! Сагърай чеб. И сеферда чна чаз чир хьанвай тIварар кьунва, чебни жезмай кьван алфавитдин къайда хвена чапзава.
Абутраб Аливердиеваз, ДГУ-дин профессордиз, физик-шаирдиз, дуьньядин халкьарин литературайрин “Парнас премия Анджело Ла Веккье” конкурсдин гъалибчидиз:
Физикни яз, лирикни,
Дуьз крариз шерикни,
Парнас вичиз муьтIуьгъриз,
КIвалахзава кьиликди.
Азим Ярагьмедоваз, дипломатдиз, армиядин генералдиз:
Дипломатвал — дилмажвал
Бязибуруз сир хьиз я.
Вун лагьайтIа а карда
Кьисмет гьялдай пIир хьиз я!
Алик Абдулгьамидоваз, публицистдиз, общественный деятелдиз, “Гафунинни хъсанвилин алакъада” — Вирироссиядин журналистрин кIвалахрин конкурсдин гъалибчидиз:
Машгьур хьанва алемдиз
Гьунарар ви къелемдин!
Ахтармишиз жедатIа
Къуват адан бегьемдиз?..
Арсен Рагьмановаз, РФ-дин гьавадинни десантдин кьушунрин генерал-майордиз:
Жуьрэтлу хва — генерал,
Ракъар къуй ви къуьнерал!
Вун хьтин хваяр мад пара
Хьурай Лезги чилерал!
Гьавизат Мамедовадиз, Ахцегь райондин архивдин заведующийдиз, РД-дин муниципальный къуллугъдин лайихлу работникдиз:
Ви къуллугъдихъ диб ава,
Лап чIехи важиб ава.
Тарифрай ви вирида:
“Чахъ ирс хуьр сагьиб ава!”
Гьажи Жабраиловаз, “Дагюгстрой” ОАО-дин гендиректордиз, “Дагъустан яшайишдинни экономикадин жигьетдай вилик тухунин лайихлувилерай” медалдин сагьибдиз:
Сан авач ви шабагьрин.
Шагь я чIехи кIвалахрин!
Къени хьурай хуьрер чи
Сумахрикни дамахрик!
Гьажибала Къазиеваз, Къурушрин 1-нумрадин юкьван школадин муаллимдиз, “Къурушрин сес” газетдин кьилин редактордин заместителдиз, “Хасавюрт райондин Гьуьрметлу агьали” тIварцIин сагьибдиз:
Бязибуруз — къураба.
Бязибуруз — мураба.
Ви гьуьрмет чаз аквазва —
Якъутрик квай кагьраба.
Демир Бегаз, Симферополда сифте яз урус чIалал чапдай акъуднавай афоризмайрин “Гунагьар кьадай зиярат” — кьетIен ктабдин автордиз:
Руьгь сагърай ви, Демир Бег!
Камалдиз я эмир — бег!
Шерни фитне шуьрекат
РикIера чи тамир, бег!..
Заур Алисултановаз, ДГУ-дин профессордиз, виридалайни жегьил илимрин доктордиз, РД-дин Кьилин общественный куьмекчидиз:
Галактика вердишда
Акьулди ви зирекдиз.
Чилинвийриз багъишда
Адан сирер керчекдиз.
Исмаил Исмаиловаз, Сулейман-Стальский райондай тир зегьметдин ветерандиз, “Хайи чилиз кIанивал къалурунай” знакдин сагьибдиз:
Хайи чилиз кIанивал
Къалурзава жеривал.
Зегьметчи хва, гьуьрмет хуьз,
Ашукь хьанва вири вал!
Казбек Думаеваз, Лезгийрин госмуздрамтеатрдин цIийи кьилин режиссердиз:
Эй сегьнедин Шарвили!
Твах вуна чи кар вилик!
Театрдин чи милли
Акъуд гена тIвар виниз!
Керим Бабаеваз, Кьулан СтIалрин юкьван мектебдин муаллимдиз, “РД-дин лайихлу муаллим” тIварцIин сагьибдиз:
Лайихлувал мад виниз,
Акъатрай ви ад виниз!
Лугьудайвал халкьари
Акъатна ви яд виниз!
Кичибег Мусаеваз, Дагъустандин халкьдин шаирдиз:
Къалур чIалан зерифвал,
Къведа мадни тариф вал.
Устадвилин уламра
Гьич тахьурай зайифвал…
Маисат Балихановадиз, Сулейман-Стальский райондин ЦРБ-дин старший медсестрадиз, РД-дин здравоохраненидин лайихлу работникдиз:
Лезги ханум Маисат
Къайгъудар я халисан.
Сагъламвилиз инсанрин
РикIни гуда гьамиша.
Марина Ибрагьимовадиз, ДГУ-дин магистрантдиз, Вирироссиядин жегьил авторрин “Зи уьлкве — зи Россия” конкурсдин гъалибчидиз:
Хайи чIалан деринрай
Жагъурзава ширинар.
Гьавиляйни къвезва вал
Чи руьгьдин аферинар.
Рафик Сефербеговаз, ахнигви куьнуьчидиз, “2019-йисан вирт” — международный конкурсдин гъалибчидиз:
Тариф хьанва уьлкведиз
Лезги чилин виртIедин.
Белки, чавни агакьин,
Дадмишиз са гетIедин…
Саният Урдухановадиз, Ахцегьрин ЦРБ-дин духтурдиз, “РД-дин лайихлу духтур” тIварцIин сагьибдиз:
Чи Ахцегьрин адет я —
Машгьурун хуьр, женнет яз!
Лайихлу тIвар чи рушаз
Лап адетдин гьуьрмет я!
Сефият Къалабеговадиз, Ахцегьрин 1-нумрадин юкьван мектебдин муаллимдиз, “РД-дин лайихлу муаллим” тIварцIин сагьибдиз:
Мектеб я ам чешнедин,
Лап къадимлу бинедин.
Хуш тебрикрин сел атуй,
Булахар хьиз дегьнедин.
СтIал Мислиматаз, чи аямдин виридалайни яшлу, савадлу, камаллу дидедиз — шаирдиз, РФ-дин Президентдин Чухсагъулдин чарчин сагьибдиз:
Мад тахьурай Саядар,
Лагьай туькьуьл баядар.
Шииратдин Диде чи
Я бахтунин аяндар!
Фезилагь Велихановаз, Махачкъаладин 3-нумрадин больницадин духтурдиз — шаирдиз, Вирироссиядин шаирвилин “Зеленый листок” (“Къацу пеш”) конкурсдин лауреатдиз:
Духтур — шаир ни и кар
ИйидатIа мад инкар?
Гъалибчи я парнасда
Чи тарифрин себебкар.
Хатима Нисредовадиз, “Дагъустан” ГТРК-дин журналистдиз, “Дуьзвал ва адалатлувал” — Вирироссиядин журналистрин кIвалахрин конкурсдин гъалибчидиз:
Вуч агакьда дуьзвилив!
Адалатни хуьз вилив!
ГьикI тарифдач чнани
Чи ханумрин чирвилин!
Энрик Муслимоваз, РД-дин милли политикадин ва динрин крарин рекьяй министрдиз:
Республика миллетрин
КIвал я къени адетрин.
Гъиз алакьа, сердер хва,
А кIвал мадни мешребдиз!
Ярагьмед Ярагьмедоваз, Сулейман-Стальский райондин культурадин управленидин чIехи къуллугъчидиз, РД-дин культурадин лайихлу работникдиз:
Тамадайрин тамада,
Тур межлисар тIамада!
Ви илгьамди гевгьерар
Акъудда, дуст, къумадай!
«Лезги газет»
