Ахцегь районда муниципалитетдин координационный совет тешкилунин гьакъиндай къарардин бинедаллаз гьа юкъуз Советдин сифте заседание хьана. Анал халкьдин арада гьуьрмет авай активный общественникар тир 25 касдикай ибарат къурулуш ва Советдин председателвиле Али Исмаилов, секретарвилени Ирина Саидмегьамедова хкяна.
– Районда общественный цIийи тешкилат кардик кутунин мурад-метлеб гьукумдин органринни халкьдин гегьенш къатарин арада карчивилинни ихтибарлувилин сих алакъаяр дуьзмишун я, – лагьана Абдул-Керим Палчаева. – Аквазвайвал, алай вахтунда чна, бюджетдинбур тушир пулдин такьатар желбуналди, Ахцегьар ва санлай район аваданламишун, агьалийриз яшайишдин къулай шартIар яратмишун патал еке крарик кьил кутунва. Кьилди къачуртIа, 30 миллион манат серфна, Ахцегьрин ХIХ асирдин машгьур къеле туькIуьр хъувунин проект гьазурзава; ЦРБ-диз 50 миллион манатдин къимет авай тадаракар къачунва, больницадиз паталай хъсан духтурар гъиз кIанзава; Ахцегьрин 1 ва 2-нумрайрин школайриз 10 миллион манатдин къимет авай кIелдай тадаракар къачунва; Рутулрин Лаалан дередай хъвадай михьи яд гъиз эгечIнава (тахминан къимет — 340 млн. манат); рекьера къир цазва, Ахцегьрин центрада, хсуси куьгьне кIвалер чукIурна иесийриз эвездин пулар хганва), хъсан фонтанни галай багъ, девирдин истемишунрив кьур мугьманхана, ресторан, Калун участокда 5 гектардин майдандал 400 аялдин чка авай школа-интернат эцигун фикирдик ква. ГьакI Фиярин хуьруьз фидай рекье муьгъ туькIуьрна, бегьемарзава ва икI мад.
Амма гьайиф къвезвай кар ам я хьи, чи жемят, гьа виликдай хьиз, къайгъусуз, активсуз яз ама. Гуя кьасухдай хьиз кьецI гуз, чиркин ятар цин хуларикни къаналрик кутазвайбур, зирзибилар гьар гьинал хьайитIани гадарзавайбур, нефс вилик кутуналди, рекьер-хуьлер кьазвайбур, рекьера ятар твазвайбур, налогрин ва коммунальный къуллугърин пулар тагузвайбурни гьалтзава. Чна халкь суствиляй акъудун, уяхарун, гъиле кьунвай чIехи крара шериквалун, чаз алакьдай куьмек гун патал координационный совет арадиз гъанва. Вири месэлаяр инсанрин тербиядинни образованидин дережадилай аслу я. Гьа кардизни гила чна кьетIен дикъет гузва: хъсан муаллимар премийралди, чешнелу аялар стипендийралди гьевесламишзава.
Лугьун хьи, хиве кьунар виликдайни гзаф хьана, ахпа абур яваш-яваш рикIелай фена. И сеферда, кьиле Абдул-Керим Палчаев аваз, жумарт спонсоррин куьмекдалди ва халкьдикай даях кьуналди, абур кьилиз акъуддай къаст ава.
Дашдемир Шерифалиев
