“Лезги газетдиз” РД-дин Кьилин пресс-къуллугъди хабар гайивал, республикадин гьукуматди “Аялрин виш бахча” проект кардик кутазва. Адан сергьятра аваз мектебдиз фидалди яшара авай аялар кьабулдай образованидин идарайра цIийикIа туькIуьр хъувунин кIвалахар кьиле тухуда.
Къейд ийин хьи, шегьерринни районрин администрацийри РД-дин экономикадин ва мулкар вилик тухунин министерстводиз аялрин бахчаяр цIийикIа туькIуьр хъувун патал арзаяр рекье тун лазим я. Ремонтдин кIвалахриз пулдин такьатар республикадин ва муниципалитетрин бюджетрай чара ийида.
ЦIийи проектда, “100 мектеб” проектда хьиз, меценатри иштиракдайвал туш. Санлай къачурла, Дагъустанда аялрин 900 бахча ава, абурукай 300 цIийи хъувуна кIанзава.
РикIел хкин, республикада “100 мектеб” проект 2018-йисалай кьилиз акъудзава. И девирда региондин бюджетдай ва меценатри чара авур такьатрихъ 570 мектебда ремонтдин кIвалахар кьиле тухвана.
«Лезги газет»
