Алатай гьафтеда республикадин ­Дуствилин кIвале РД-дин милли сиясатдин ва диндин крарин рекьяй министерстводи тешкилнавай “Дин ва массовый информациядин такьатар” лишандик кваз йикъан месэлайриз талукь мярекат кьиле фена.

Ам ачухунихъ ва иштиракчияр тебрик авунихъ галаз сад хьиз, РД-дин милли сиясатдин ва диндин крарин рекьяй министр Энрик Муслимова къейдна:

— Гьуьрметлубур, и мярекатда къе государстводин гьукумдин органрин, динрин, общественный организацийрин, ОТК-дин ва СМИ-рин векилри, гьакI Ко-ми Республикадай атанвай чи мугьманри иштиракзава. Алай вахтунда диндиз талукь месэлаяр лап мура­каббуруз элкъвенва. Чи республикада ва гьакI уьлкведа къурхулу гьалар тваз кIанза­вай къуватри, диндикай менфят къачу­налди­, чпин зиянлу мурадар, крар кьилиз акъудзава, чи жегьилрин кьилер какадарзава. Гьавиляй СМИ-рин вилик чи агьалияр, иллаки жегьил несилар, диндин гьакъиндай дуьз гъавурда тунин ва вуж вуж ятIа чирунин, ачухарунин важиблу везифа акъвазнава. Къе СМИ-ринни диндин ва общественный организацийрин векилри санал менфятлувилелди кIва­ла­ху­нин гьакъиндай веревирдер ийида.

Сифте гаф къачуна рахай Магасдин диндин округдин ибадатханадин настоятель, иеромонах Ионна лагьана: — Республикада динриз талукь яз тухузвай сиясатдилай ина авай вири динрин векилри разивалзава. Чаз са патахъайни манийвилер гузвач. Агьалийрини динэгьлийрин арада тафават твазвач. ТIугъвал себеб яз инсанар кIвалера ацукьуниз мажбур хьайила, волонтерри виридаз куь­мекдин гъил яргъи авуни и кардин гьа­къин­дай шагьидвалзава. Чнани, пуд диндин векилри, санал кIвалахзава. Кар алайди акьалтзавай несилдиз дуьзгуьн тербия гунин месэла я. И карда бязи вахтара чи алахъунрихъ туькIвей нетижаяр жезвач. Жаванар социальный сетрин нагьакьан таблигъатдин эсердик акатзава. Советрин девирда диндин идарайрин ракIарар агалнавайтIани, акьалтзавай несилдиз, сад лагьай классдилай га­тIунна, ахлакьдин, марифатдин, ватанпересвилин, инсанвилин тербия гузвай. Динрин ва СМИ-рин векилри общественностдин куьмекни галаз гьа и рекьяй дурумлудаказ кIва­лахна кIанда.

РД-дин Муфтиятдин медиахолдинг­дин векил Наира Магьмудовади чи агьа­лияр, ил­лаки жегьилар, Исламдин диндин гафарин (жихад, шахид ва мсб.) манадин гъавурда ава­чирди ва СМИ-ри и карда абуруз куьмек гана кIанзавайди къейдна.

Политолог, телеведущий Ханжан Къурбанова СМИ-ри Ислам диндиз зиян гузвай “диндин экстремизм”, “джи­хадизм”, “исламдин терроризм” ва гьа ихьтин маса гафар ишлемишунал эхир эцигуниз эвер гана. И терминар Исламдин диндихъ галаз са алакъани авачирбур я.

Чи мухбир