Аморфофаллус

Шикилдай аквазвай набатат Африкадин, Азиядин, Австралиядин ва Океаниядин тропикрин ва субтропикрин мулкара экъечIзава. Адан 170 жуьре малум я.

Еке жуьредин (титанический) аморфофаллусдин заланвал 50 килограммдив агакьун мумкин я. Цуькведин кьакьанвал — 2,5 метрдив, гьяркьуьвал 1,5 метрдив­ агакьда. Итижлу делил ам я хьи, и набататди 5 (бязи дуьшуьшра 10) йисуз садра цуьк акъудзава. Цуькведа авай муддатни анжах кьве суткада давам жезва. Гьейранардай ва кьетIен жуьредин акунар аватIани, пешекарри тестикьарнавайвал, и цуьк набататрикай виридалайни нагьакьан ни галайди я. Алимри аморфофаллусдин ни лахъу какайрихъни балугъдихъ жедайдаз ухшар я лагьанва. КьетIенвал ам я хьи, и цуькведин такIан ни анжах адак хуькуьрайла, пайда жеда.

Набататдин дувулдихъ галай майва Япониядин адетдин кухняда шурпадик кутазва ва я бугъламишна гьазурдай хуьрекриз алава авун патал ишлемишзава. Медицинадин хиле лагьайтIа, дувулдихъ галай майвадикай диабетдин суьрсетар гьазурунин карда хаммал яз менфят къачузва.

Гьазурайди — К.Ферзалиев