Мукьвара Дагъустандин мектебрив цIийи автобусар агакьда. 10 йисалай гзаф вахтунда ишлемишзавай, куьгьне хьанвай улакьар абуралди эвезда. И рекье кIвалах РФ-дин Гьукуматдин къарардин бинедаллаз кьиле тухузва. Адан бинедаллаз, школайрин хсусиятда авай ва аялар санай-масаниз тухузвай куьгьне вири автобусар 2020-йисан эхирдалди дегишна куьтягьун лазим я.
Дагъустан Республикада школаяр патал цIийи улакьар республикадин бюджетдин гьисабдай маса къачузвай им сифте сефер я. 186 миллион манатдин кьадарда аваз фикирда кьунвай такьатрихъ 95 автобус маса къачуда ва идалди республикада куьгьне хьанвай автобусар цIийибуралди эвезунин месэла тамамдаказ гьялда.
Идалайни гъейри, алава 70 автобус и йисуз федеральный бюджетдин такьатрин гьисабдай маса къачуда. Абур чпихъ аялар мектебдиз улакьда аваз гъунин игьтияж авай, амма, транспортдин такьат тахьун себеб яз, ихьтин мумкинвал авачир школайриз гуда. И макьсаддалди РД-дин образованидин ва илимдин министерстводи образованидин идараяр автобусралди таъмин хьунин дережа виликамаз ахтармишнава ва муниципалитетрин арзаяр кьабулнава.
Транспортдин такьатар школайриз пайдайла, асул гьисабдай абур аялар яшамиш жезвай чкайривай яргъа хьун ва муниципалитетар аялар тарсариз гъунин-хутахунин гьерекатдин хатасузвал таъминариз гьазур хьунин дережа фикирда кьада.
“Школаяр патал икьван кьадарда аваз автобусар республикади маса къачузвайди сифте сефер я. Алай йисуз чавай автобусралди пландик кутунвай 70 школа ваъ, 165 школа таъминариз жеда. И кIвалах идалай кьулухъни давам жеда. Аялар мектебрив агакьарунин игьтияж авай образованидин вири идараяр транспортдалди таъминарда”, — къейдна вице-премьер — РД-дин образованидин ва илимдин министр Уммупазил Омаровади.
Школайрин автобусри сифте рейсер гьеле цIийи йис алукьдалди тамамарда. Абурун са пай республикадив агакьнава ва алай вахтунда Махачкъалада ава. Амай пай мукьвал йикъара агакьда, хабар гана министерстводин пресс-къуллугъди.
Амина Муслимова
