Алкьвадар Гьасанан тIварунихъ галай центради алим
Гьажибег Гьажибегован 120 йисан юбилейдин сергьятра
аваз лезги публицистикадай махсус конкурс кьиле тухуда
6-ноябрдиз Махачкъалада Алкьвадар Гьасан эфендидин тIварунихъ галай медениятдинни марифатдин центрадин активдин нубатдин заседание кьиле фена. Адан кIвалахда РД-дин Халкьдин Собранидин депутатар тир Ильман Алипулатовани Самир Абдулхаликьова, РД-дин Общественный палатадин член Ислам Мегьамедова, СтIал Сулейманан райондин кьилин заместитель Эльдар Рустамова, Каспийск шегьердин мэрдин заместитель Арсен Шерифова, генерал Шамил Асланова, полковник Нисрет Исмаилова, ДГПУ-дин профессор Шайдабег Мирзоева, карчи Мурад Мегьамедкеримова, жемиятдин векилар тир Идаят Насирова, Вячеслав Къурбанова, Сиражудин Къазибегова, Гьасангьуьсен Абдулжелилова, Мегьамед Алиева, Мегьамед Мегьамедова, писатель Гьажи Ильясова ва масабуру иштиракна.
Мярекат центрадин директор Мегьамед Ибрагьимова кьиле тухвана. Заседанидин эвел кьиляй ада центради октябрдин вацра кьиле тухвай кIвалахдин нетижаяр кьуна ва йисан эхирдалди гьихьтин месэлаяр гьялна кIанзаватIа къейдна. Алатай вацра авунвай кIвалахрикай рахайтIа, Дагъустандин эдебиятдин классик Кьуьчхуьр Саидан 255 йис тамам хьунин сергьятра аваз ктаб акъудуниз пулдин такьатар чара авурди центрадин векил Самир Абдулхаликьов я. Шаирдин юбилейдиз талукьарнавай мярекат кьиле тухуникни центради вичин пай кутуна.
Вилик акъвазнавай месэлайрикай рахадайла, М.Ибрагьимова цIи Дагъларин уьлкведин машгьур алим Гьажибег Гьажибегован 120 йис тамам хьанвайди къейдна ва А.Гьасанан тIварунихъ галай центради “Лезги газетдин” редакциядихъ галаз санал декабрдин эвел кьилера Махачкъалада алим-лингвистдин юбилейдин мярекат тешкилдайдакай хабар гана. “Гьажибег Гьажибегован юбилейдин сергьятра аваз адан хайиди тир Ахцегь райондин мектебра кIелзавай аялрин арада лезги публицистикадай махсус конкурс кьиле тухуда ва гъалибчийриз пулдин пишкешарни дипломар гуда”, — алава хъувуна центрадин директорди.
Ислам Мегьамедовани Шайдабег Мирзоева Гьажибег Гьажибегован юбилейдин сергьятра аваз ДГПУ-да, лезги чIалаз талукьарна, илимдинни тежрибадин конференцияни кьиле тухун теклифна. Иштиракчийри и теклифдин тереф хвена. Конференция къведай йисан эвел кьилера тешкилун фикирдиз къачунва. И мярекатдин патахъай заседанидал жавабдар ксар яз И.Мегьамедовни Ш.Мирзоев тайинарна.
А.Гьасанан тIварунихъ галай центради цIи дидедиз хьайидалай инихъ 145 йис тамам хьанвай лезгийрин машгьур шаир Хпеж Къурбанан ирс хуьнизни фикир гудайвал я. Кьилди къачуртIа, центрадин такьатрихъ цIи “Мавел” чапханада шаирдин ктаб чапдай акъудда. Къейд ийин хьи, ам гьазурнавайди чи йикъарин сейли писатель, “Лезги газетдин” сиясатдин отделдин редактор Нариман Ибрагьимов я.
М.Ибрагьимова гьакIни малумарайвал, йисан эхирдалди центрадин официальный сайт, социальный сетра хсуси аккаунтар кардик акатда.
Центрадин асул везифаяр къейддайла, гуьгъуьнлай рахай диндин алим Ямин гьажи Мегьамедова цIийи тешкилатди хайи чIал, дин, тарих, милли меденият хуьнин, вилик тухунин карда кьетIен чка кьазвайди лагьана. Адан фикирдалди, центр вири халкьдин умуми медени макандиз элкъведа ва адан кIвалах вилик финин, тIвар машгьур авунин, вилик акъвазнавай месэлаяр гьялунин карда гьар са ватанэгьлиди вичин пай кутун герек я. Заседанидин сергьятра аваз, Я.Мегьамедова вичи кьиле тухузвай кIвалахдикайни суьгьбетна, иштиракчияр вичин къелемдикай хкатнавай диндин ктабрихъ галаз танишарна.
Ильман Алипулатова гьисабзавайвал, центрадикай лезги халкьдин тIал алай месэлаяр гьялзавай майдандикай хьиз менфят къачуна кIанда. Ада вири районра цIийи тешкилатдин филиалар ахъаюниз, центрадин векилрин иштираквал аваз районра чкадин администрацийрин коллективрихъ, агьалийрихъ галаз гуьруьшар тешкилуниз асул фикир гун тIалабна. Депутатди гьисабзавайвал, центр халкьдин игьтияжриз жаваб гузвай идара хьун герек я.
Генерал Шамил Асланова рахунрилай гьакъикъи крарал элячIдай вахт алукьнавайди лагьана ва центрадин дарамат эцигунин карда куьмек хьун патал хейлин мергьяматлу крарик кьил кутазвай чи кьегьал ватанэгьли Сулейман Керимоваз чар рекье тун ва Махачкъалада Лезгинцевриз эцигзавай памятникдихъ галаз алакъалу месэлани центрадин гуьзчивилик кутун теклифна.
Саки кьве сятда давам хьайи заседанидал иштиракчийри гьар сада вичин фикирар лагьана. Хпеж Къурбанан юбилейдиз талукьарнавай мярекат тешкилунин гьакъиндай Гьажи Ильясова, лезги районрин мектебра дидед чIалан тарсарин сятерин кьадар артухарун патал муниципалитетрин кьилериз махсус чарар кхьинин патахъай Ш.Мирзоева гайи теклифарни иштиракчийри важиблубур яз гьисабна.
Заседанидин нетижаяр кьадайла, М.Ибрагьимова нубатдин гуьруьш алай йисан 4-декабрдиз кьиле тухудайдакай ва анал центрадин 2023-йисан кIвалахдин план веревирд ийидайдакай хабар гана.
Агьмед Магьмудов
