И йикъара шаир Бикеханум Алибеговадиз Чуваш Республикадин халкьдин шаир Раиса Сарбиди лезги чIалай вичин чIалаз таржума авунвай шииррин ктабдин презентациядиз теклифнавай. Мярекат Чебоксары шегьердин «Дуствилин кIвале» кьиле фена.

Межлисдал рахай  Раиса Сарбиди вичинни Бикехануман арадавай дуствиликай, лезги шаирдин яратмишунрикай суьгьбетна. Са вахтара Раисадин ваха, Альбина Юратуди, Бикехануман шиирар таржума авунай ва адакай кхьенвай очерк «Пике» тIвар алай журналда чапнай.

Дагъустандиз рикI алаз мугьман жедай журналист Николай Шумера Бике­ха­нум Алибегова вичи вахай кьунвайдакай лагьана ва адаз чи шаирдин яратмишунриз бахшнавай чинар авай ктаб багъишна.­

Межлисдин сергьятра аваз чуваш ва лезги чIаларал манияр тамамарна, хейлин иштиракчийри лезги шаирдин тIварцIихъ хуш келимаяр лагьана.

Къейд ийин хьи, Р.Сарбиди чуваш­ чIа­лаз Б.Алибеговади аялар патал кхьен­вай «Цуькверин багъ» ктаб таржума авунва.

Чи мухбир