Квез чидани?

Шикилдай аквазвай геккон ажайиб гьайванрикай сад я. Чурчулрин жуьрейрикай тир адан кьилел хар-хар хьайи кIеви къабухар хьтинбур жеда. Вилер екебур, къебекьар авачирбур я. Амма къебекьрин еринда абурун вилер мембранадин кьелечI пердейри хуьзва.  

И чурчулрин гзаф жуьреяр асул гьисабдай йифен береда активвал квайбур я. Абурулай ванер-сесер акъудизни алакьзава. Вири жуьредин гекконри какаяр хазва. Абур гзафни-гзаф Азиядин, Европадин, Африкадин ва Америкадин тропикрин ва субтропикрин вилаятра яшамиш жезва. Гекконрин бязи жуьреяр океанрин островрани гьалтзава.

Алай вахтунда Чилел чурчулрин 5600 кьван жуьреяр яшамиш жезва, абурукай 1500-далайни гзаф жуьреяр гекконрик акатзава.

Гекконрин бедендин гъвечIи-чIехивал, чпин жуьрейрилай тафаватлу яз, жуьреба-жуьребур жеда. Виридалайни гъвечIи жуьрединбурун яргъивал 2 сантиметрдив агакьда. Амма бязи гекконрин яргъивилел гьатта 60 сантиметр кьван хьун мумкин я.

Гекконрин ем парани-пара бицIи тIветIерикай, цIарнахрикай, тарунрикай, цицIерикай, пепейрикай ва маса гьашаратрикай ибарат я. ЧIехи гекконри акьрабарни, гъвечIи хъиперни, кьиферни, къушарин мукарай какаярни неда.

«Лезги газет»