27-апрелдиз Дагъустандин Кьилин везифаяр вахтуналди тамамарзавай Сергей Меликова Урусатдин Президент Владимир Путинан Федеральный Собранидиз ракъурнавай Чарче къейднавай кьилин месэлаяр веревирд авуниз талукьарнавай совещание кьиле тухвана.
Вичин рахунра республикадин Кьили Президентдин Чарчин важиблувал къейдна, ана Дагъустандиз талукь месэлаярни гьатнавайдакай ва абур гьялиз эгечIна кIанзавайдакай лагьана. Абурун арада коронавирусдин тIегъуьндихъ галаз женг тухун, медицинадин рекьяй ийизвай къуллугърин ери хъсанарун, духтурханайра ва яшайишдин маса идарайра еке нубатар хьун ва маса месэлаяр ава.
Сергей Меликован фикирдалди, поликлиникайрин, аялрин бахчайрин, мектебрин, яшайишдин центрайрин ва маса идарайрин кIвалах, хизанрин ва гьар са инсандин игьтияжар фикирда кьуна, къайдадик кутуна кIанда.
Сергей Меликова Дагъустанда са жерге объектар эцигунин кIвалахар кьиле физвай гьалар критика авуна. Совещанидал ада Урусатдин хуьруьн майишатдин министерстводай хтанвай чар кIелна. Ана кхьенвайвал, республикадиз “Хуьруьн мулкар комплекснидаказ вилик тухун” программадин сергьятра аваз федеральный бюджетдай пулар ахъайзавайди къейднава. 2020-йисуз Дагъустандиз 831 миллион манат чара авунва. Вири пул харжнаватIани, къени 7 объект ишлемишиз вахканвач. И кар кьилиз акъудун патал мад алава 250 млн манат пул герекзава. Абурун арада медениятдин, спортдин, газификациядин ва маса объектар ава. Жуьреба-жуьре себебар аваз, абур кардик акатнавач. Сергей Меликова и объектар эцигун патал ахъайнавай 831 миллион манат пул квез харжнатIа ахтармишун ва чарчин копияр МВД-дизни прокуратурадиз рекье тун тупшурмишна. “Садавни чуьнуьхиз тадач. И кардал эхир эцигна кIанда”, — алава хъувуна ада.
Совещанидал мад аялриз гузвай пособийриз, зегьметдин мажибар вахт-вахтунда гуниз, вузра ришветбазвилин вилик пад кьуниз ва са жерге маса крариз талукь месэлаярни веревирдна.
Мярекатдин эхирдай Сергей Меликова къейд авурвал, вилик финин карда гуьгъуьна амукьзавай муниципалитетриз куьмекар гуда. И жигьетдай ада РД-дин Гьукуматдин Председатель Абдулпатагь Амирхановал Докъузпара райондиз фин ва ана гьалар хъсанвилихъ дегишарун патал гьукуматдивай куьмекиз жедай хилер тайинарун тапшурмишна.
«Лезги газет»
