20-октябрдиз Махачкъалада, Аваррин театрдин дараматдин вилик, халкьдин яратмишунрин ватанпересвилихъ элкъуьрнавай программайрин «Лацу дурнаяр» тIвар алай регионрин уртах фестиваль «Чун саналди» лишандик кваз чIехи концерт гуналди акьалтIна.
РДНТ-ди (Республикадин халкьдин яратмишунрин кIвал) чаз хабар гайивал, проект Дагъустанда 19-октябрдилай 23-октябрдалди «Яратмишунардай инсанар» Федеральный проектдин «Культура» милли проектдин сергьятра аваз «Россиядин культурадин фонд» жемиятдинни гьукуматдин тешкилатди чара авунвай Грант ишлемишуналди РД-дин культурадин министерстводин, Республикадин халкьдин яратмишунрин кIвалин ва Махачкъаладин культурадин Управленидин куьмекни галаз тешкилнавай.
И юкъуз сегьнедал неинки Дагъустандин, гьакI Кеферпатан Кавказдин яратмишунардай коллективри ва манидарри чпин устадвал къалурна. Дагъустандай ана Ахцегь, Акуша, Леваши, Казбек, Къумторкъала районрин, гьакIни Хасавюрт, Буйнакск, Избербаш, Къизилюрт ва Махачкъала шегьеррин фольклордин, яратмишунардай ва халкьдин театррин коллективри иштиракна, милли чIаларал халкьдин манияр тамамарна ва шиирар устадвилелди кIелна.
Чи мухбир
