Инсандиз виридалайни багьади уьмуьр я. Гьа уьмуьр патал ада вичиз ганвай муьгьлетда зегьметни, женгни чIугвазва. Гзаф вахтара инсандин лайихлувилерикай, вучиз ятIани, ам кьейидалай гуьгъуьниз лугьуда. И хъсан кар адал чан аламаз авуртIа жедачни мегер? Гьар са лайихлу касдиз хушни жедайвал, адаз вичин уьмуьр бадгьавая тефейдакай чир жедайвал.
Гьар са девирда, арифдарар, философар, шаирар, устIарар хьиз, игитарни хьана. Абур алай аямдани ава. Чи ватанэгьли Сулейман Керимов хьтинди. Вири дуьнья тIугъвалдин къурхулувилик квайла, ада Дагъустандиз ва Дербент шегьердин агьалийриз куьмек гун патал хсуси хейлин пулар харжна. Ихьтин жумартвал, куьмек дагъустанвияр тир маса девлетлу ксаривайни ийиз жедай. Амма абур кьулухъ акъвазна.
ТIугъвалдик начагъ хьайи инсанриз вирусдин алчахвиликай, хаталувиликай хабар хьанва. Амма гзафбуру барбатIвилин и вирус кваз кьазвач. Им еке саймазвал я.
Коронавирусдик зунни начагъ хьана. Заз къе Махачкъала шегьердин 1-нумрадин больницадин духтурри зун ва вишералди маса азарлуяр тIугъвалдикай къутармишун патал чIугур ва чIугвазвай зегьметдикай, женгиникай лугьуз кIанзава. Абуру, чпел акьалтзавай четинвилериз ва чеб акатзавай хаталувилизни килиг тавуна, гьафтейралди “яру зонадай” экъечI тийиз, азарлуйриз къуллугъзава.
Ара-ара чи инсанривай “Махачкъалада бегьем духтурар амайди туш, Москвадиз фена кIанда” лугьудай ихтилатрин ванер къведа. Зун абурухъ галаз гьич рази туш. АкI лугьудалди, чи духтуррин алакьунрикай чирна кIанда. Гьа са вахтунда жуван вилералдини акун лазим я, Дагъустанда гьар са начагъдаз куьмекдиз къвезвай гьихьтин духтурар аватIа.
Заз акуна ва за къе викIегьдиз лугьузва: сагърай чи духтурар! Абуру, тIугъвалдихъ галаз женг чIугвадайла, чеб гьихьтин духтурар, пешекарар ятIа къалурна.
Алай йисан 7-июлдиз тIугъвалдик азарлу хьайи зун Махачкъала шегьердин больницадин садакай масадак акатдай азаррин отделенидиз тухвана. Авайвал лугьуда, отделенидин вири палатаяр начагъбурув ацIанвай. Лап кIевел алай азарлуяр акурла, заз элкъвена кIвализ хъфиз кIан хьана. Амма духтурар зав эгечIай тегьерди, абурун рафтарвили зун жуван фикирдилай алудна. Духтурар ва амай медперсонални тIугъвалдик ажуз, зайиф хьанвайбуруз талукь вири жуьредин куьмекар гуз, абур ажалдин къармахрай ахкъудиз алахъзавай. Абуруз анжах аферин лугьуз жеда.
Коронавирусди зун лап кIеве туна. Духтуррин куьмек тахьанайтIа, завай къе и макъалани кхьиз хъжедачир. Абуру зун, лугьудайвал, агъа дуьньядай винел хкана. Заз къе зун ва гьакI цIудралди дагъустанвияр сагъар хъийизвай больницадин вири коллективдиз, гьа гьисабдай яз садакай масадак акатдай азаррин отделенидин заведующий Ш.Сулеймановаз, духтурар ва медсестраяр тир М.Абдуллаеваз, М.Мегьамедоваз, Д.Мегьамедовадиз, З.Абдулабеговадиз, М.Шихшабеговадиз, А. Мегьамедовадиз, З.Къазиагьмедовадиз, Д.Омаровадиз, З.Къагьримановадиз, Н.Перезукаевадиз ва Ю.Абакаровадиз, юкь агъузна, икрамиз ва сагърай лугьуз кIанзава. Абуру чпин пешекарвилин лап виниз тир дережа, инсанпересвал успатна.
Къуй виридаз Аллагьди куьмекрай! Чпин везифаяр намуслувилелди кьилиз акъудзавай духтуррилай Аллагь рази хьурай!
Минасат Кургъулиева,
Каспийск шегьердин архитектурадин ва
эцигунрин колледждин муаллим
