— КIвачерихъай, гьекь хьана, пис ял къвезвайла, мегъуьн тарцин чкалрин гьалимади куьмекда. Ам икI гьазурда: са пай чкалриз цIуд пай яд яна, зайиф цIал эцигна, 30-40 декьикьада ргада. Ахпа гьалимадиз 10 мл прополисдин настойка ва хуьрекдин са тIуруна авай вирт алава хъувуна, хъсандиз хуькуьрда. Гьалимадин чимивал 30 градус хьайила, 20 декьикьада кIвачер гьа и це твада. Сагъарунин курс 10 югъ я.
— Цвар кьаз тахьунин азарди чIехибурузни, аялризни азаб гуда. Ихьтин азардиз шивитрин тумуни куьмек гуда. Хуьрекдин са тIуруна авай шивитрин тумунал ргазвай яд илична, хъсандиз кIевирна, 2-3 сятда тада. Ахпа ам куьзна, чими гьалима вири санлай хъвада. Сагъарунин курс 5-7 югъ я.
— Жалгъаяр тIазвайла, гьар экуьнахъ ва нянихъ еке 3-4 кIус хали тIуьн меслят къалурзава. Мадни, иринламиш хьанвай хирер халидин мижедай чуьхвейтIа, абур фад сагъ хъжеда.
— Ратарин азар авайла, са гъапа авай халидин кьурурнавай чкалрал 2 истиканда авай ргазвай яд илична, 20 декьикьада тада. Ахпа йикъа 4-5 сеферда 1/2 истиканда авайди хъвада.
— Жалгъаяр тIазвайла, ичерин сирке чими цик хуькуьрна, кIвачериз ва гъилериз ванна ийида. Эгер гардан ва бедендин маса чкаяр тIаз хьайитIа, жунадин пек, и чими къаришмадай кьежирна, тIазвай чкайрал эцигда. Ихьтин къайдади лап хъсан нетижаяр гуда.
— Дамарра ивидин гьерекат хкаж хьанвайла ва ивидик квай холестериндин кьадар гзаф тирла, агъадихъ галай рецептди хъсан нетижаяр гуда.
Куьлуь авунвай са силих серг, хуьрекдин са тIуруна авай лимондин миже, куьлуь авунвай са сенжефил, хуьрекдин са тIуруна авай ичерин сирке, чайдин са тIуруна авай вирт вири сад-садак какадарна, хъсандиз хуькуьрда. Ахпа и къаришма экуьнахъ, нисинихъ ва нянихъ йикъа пуд сефердилай гзаф тушиз ишлемишда. Са гьафтедилай куьне куь сагъламвал хъсан хьанвайди гьиссда.
— Халкьдин арада сушеница хъач хирер фад сагъардай дарман яз гьисабзавай. Идалайни гъейри, ам рикIин, ратарин ва гзаф маса азарар патални хийирлу я. Месела, хуквадин ва ратарин азарар сагъарун патал ам икI гьазурда: 1 л циз хуьрекдин са тIуруна авай хъчар вегьена, са тIимил ругуна, са сятда тада. Ахпа ам куьзна, холодильникда эцигна, йикъа кьуд сеферда 50 мл ишлемишда.
“Айболит” газетдай.
Гьазурайди — Надият Велиева
