Лезги хуьрекар
Чул (хешил хапIа) гьазурун патал кIан яцIу катул герек къведа. Пичиник цIай кутуна, яд авай катул эцигда.
Чул гьазурун патал къачу:
1 истикан гъуьр;
2 истикан яд;
1-3 тIур чIем;
4 тIур пасукI;
1 тIур дуьгуь;
Звал акъатдалди, яд ргана, ахпа катул пичинилай алудда. 5 декьикьа алатайдалай кьулухъ катул мад цIал эхцигда.
Гъуьр сафунай яна, тIимил-тIимил цик вегьез, кIарасдин тIуруналди хуькуьрда. ЦIай лап явашарна, гъуьруькай тIурар тежедайвал, акъваз тийиз тIур хуькуьрда. Катулдал кьул эцигна, вахт-вахтунда хуькуьриз, 50 декьикьада мад ргада хапIа. Чул ргадайла, тIуруналди вахт-вахтунилай хапIа инихъ-анихъ ийиз, тIимил кьван яд цада. ИкI чул катулдин кIанел алкIидач.
Са сят кьван алатайла, цIай хкудна, чи-мизмаз хапIа къапариз акъудда. ХапIадин юкьва легъв авуна, аниз са тIур чIем, винелай хатрутрин миже — мед — вегьена, хуькуьриз, неда. Нуш хьурай квез!
Нарима Агьмедова
