Райондин регьбер СВО-дин иштиракчийрихъ галаз гуьруьшмиш хьун махсус серенжемдив эгечIай гьа сифте йикъалай хъсан адет хьанва. И мукьвара Ахцегь райондин кьил Абдул-Керим Палчаев хайи ватандиз рухсатдиз хтанвай СВО-дин иштиракчи Гьажимет Гьажиметовахъни адан диде Саимат Мулидиновнадихъ галаз гуьруьшмиш хьана. Ада вичин кабинетда аскердин сагъламвилин, хизандин гьал-агьвалдин гьаларин патахъай абурухъ галаз ачух суьгьбетна, вичин ва гьукуматдин патай куьмек теклифна.
Гьажимет Балабеговича дяведин махсус серенжемда вичин ва чи аскеррин гьакъисагъ къуллугъдикай, руьгьдин мягькемвиликай ва душмандин винел гъалибвилихъ инанмишвиликай фикирар лагьана.
— Украинадин фашистрихъ галаз дяведик экечIна, хушуналди тир мобилизация малумарнавайдакай ван хьанмазди, зун 2022-йисан августдиз арза гваз Ахцегь РВК-диз фенай. Итимвилин кьилин буржи ватан хуьн я эхир. Диде ва маса багърияр фадлай акунвачир. Мумкинвал хьанмазди, ингье абурун патав хтанва. Исятда зи юлдашар укронацистрихъ галаз къати женгера авайди чиз, рикI гьана ава. Куьруь рухсат куьтягь хьанмазди, абурун куьмекдиз хъфида. Дяведа женгинин дустар хайи стхайрилайни багьа жеда. Зи фикирдалди, анжах дяведин кьетIен шартIара чир жеда вуж вуж ятIа. Вафалу дустар жагъида, — ихтилатзава викIегь аскерди.
Гьажимет 1975-йисуз Ахцегьа зегьметкеш чIехи хизанда дидедиз хьана, Ахцегьрин 2-нумрадин юкьван школа куьтягьайдалай ва са кьадар вахтунда хуьруьн майишатдин хиле кIвалахайдалай кьулухъ армиядин жергейриз фена. 1996-йисуз РФ-дин Армияда къуллугъзавай жергедин аскер Чечнядин 1-дяведа Хаттабан жаллатIрин аксина гъиле яракь кьуниз мажбур хьана. Ахпа ада, 1999-йисан август-сентябрь варцара Дагъустандал яракьлу террористри гьужумайла, Къарамахи, Чабанмахи хуьрерин дяведин вакъиайра жуьрэтлувилелди иштиракна. Игитвилелди ватан хуьзвай адаз гьукуматдин чIехи шабагь ганва. Абурун арада «Жуьрэтлувилин орден», «Дяведа тафаватлу хьунай», «Игитвиляй» женгинин медалар ава. Акьалтзавай несилдиз ватан хуьнин чешне тир адал чна дамахзава. Къуй дяве гъалибвилелди куьтягь хьана, Гьажимет Гьажиметов ва адахъ галаз чи амай вири рухваярни, хуруйрал орденарни медалар алаз, сагъ-саламатдиз чпин багърийрин патав хтурай!
Эхирдай Абдул-Керим Нажмудиновича Гьажиметаз ва гъиле яракь аваз, СВО-да душмандин хура акъвазнавай чи вири ватандашриз мад сеферда чухсагъул лагьана. «Ахцегьрин чили герек чIавуз Ватандин таъсиб хуьдай кьегьал рухваяр майдандиз акъудзавайдахъ, къе Гьажиметахъни адан дидедихъ галаз суьгьбет авурла, зун нубатдин сеферда инанмиш жезва. Пара кьадар сагърай куьн! Чна квелди дамахзава, куь чешнейралди жегьилар ватанпересвилин руьгьдаллаз тербияламишзава. Алакьдай вири жуьредин куьмекар ийизни чун гьазур я», — алава хъувуна райондин кьили.
Дашдемир Шерифалиев
