13-январдиз Россиядин журналистри пешекарвилин сувар — Печатдин югъ къейдзава. И юкъуз, 1703-йисан 13-январдиз, Россиядин пачагь I Петрдин буйругъдалди уьлкведин массовый информациядин сад лагьай такьат — “Ведомости” газетдин сад лагьай нумра акъатнай. I Петрдихъ цIийивилер гзаф хьанайтIани, ада кьил кутур “Ведомости” газетдин гележег экуьди хьана лагьайтIа жеда. А чIавалай инихъ газетрихъ галаз алакъалу кIвалах мад акъваз хъувунач. Гьаниз килигна, 13-январь Ватандин журналистика арадал атай югъ яз гьисабзава.
Алай вахтунда чи уьлкведа массовый информациядин 83 агъзур такьат официальнидаказ регистрация авунва. Роскомнадзордин эхиримжи делилралди (2016-йисан февраль), абурун чIехи пай печатдин изданийрал — газетрал ва журналрал гьалтзава. Девирдин цIийи жуьредин изданийри — онлайн СМИ-ри ва ТВ-ди 11% ва 10% процент тешкилзава. MediaDigger платформадин делилралди, санлай къачурла, РФ-дин мулкунал 102 чIалал газетарни журналар акъатзава.
Къейдна кIанда хьи, цIийиз пайда жезвай газетрин ва журналрин кьадар къвердавай гзаф хьуникди, милли чIаларал акъатзавайбурун гьалар хаталувилик акатзава. Вучиз лагьайтIа, чIалар квахьзава, дуьз лагьайтIа, квадарзава. Чебни — халкьари чпи. Месэладиз бес кьадар фикир тагуналди. Гьихьтин себебар аваз хьайитIани, асул себеб чна чи акьалтзавай несилрив чал аманат яз бубайрилай атанвай хайи чIал агакьар тавуникай ибарат я. ЧIал хуьзвайди халкь я. Гьайиф хьи, икьван чIавалди хуьрерин чкайра хьайитIани чIалан михьивал хуьзвайтIа, гила, Интернетдин девир алукьайла, анрани гьалар акваз-акваз дегиш жезва.
И жигьетдай чаз лезги чIалал акъатзавай виридалайни чIехи изданидихъ — “Лезги газетдихъ” галаз датIана алакъа хуьзвай чи амадагриз, газет кIелзавай, ам подписка ийизвай, цIийи теклифар гузвай — са гафуналди, къайгъударвалзавай гьар са ватанэгьлидиз рикIин сидкьидай чухсагъул лугьуз кIанзава.
Печатдин йикъан вилик чаз чи газетдин мухбирризни, мукьвал-мукьвал кхьизвай авторризни, чи газетдин ветеранризни саламар рекье тваз, сувар мубаракиз кIанзава. Гь.Гашаров, Гь.Къурбан, А.Эсетов, Ф.Гъаниева, А.Къардаш, К.Казимов, С.Абил (Межидов), Х.Кьасумов, Н.Къарибов, А.Саидов, Т.Мегьамедов, К.Ферзалиев, Б.Шихмурадов, Т.Гьабибов, Гь.Ильясов, Э.Заирбегова, Ш.Шагьбалаев, Х.Мамедова, В.Жамалдинов, А.Рамазанова, С.Шагьпазов, А.Ашурагъаев… — виридан тIварар кьунвачтIани, сагърай куьн вири. Чна куь макъалаяр вилив хуьзва!
Жасмина Саидова
