Мегьарамдхуьруьн районда адетдинбур тушир, аяздиз дурум гуз жедай, чпел ажайиб тIвар алай («Черный принц») чIулав машмашар битмишарзава. Идакай «Лезги газетдиз» Мегьарамдхуьруьн райондин администрациядин пресс-къуллугъди хабар гана.

И жуьредин машмашар райондиз чкадин багъманчи Фейзуддин Ибрагьимова гъанва. Багъманчи 1997-йисалай емишар битмишарунал машгъул я. Алай вахтунда адахъ 25 гектар майдан кьунвай фад ва бул бегьер гудай багълар ава. Къейдзавайвал, гьелелиг багълари 80 тондив агакьна экологиядин жигьетдай михьи емишар гузва. Гележегда адаз суперинтенсивный багъдин 1 гектардин бегьер 100 тондив агакьариз кIанзава.

Багъманчиди районда, гьатта Дагъустандани сифте яз битмишарзавай емишрин сортарал инсанри фикир желбзава. Адан багъда емишрин адетдинбур тушир сортар гзаф ава. ЧIулав машмашрикай рахайтIа, абур августдин вацра дигмиш жеда. Ихьтин машмашар Россиядиз Ирандай гъанва. Мегьарамдхуьруьн райондин гьавадин шартIарихъ галаз и сорт хъсан кьазвайвиляй фермерди вичин майишатда абур битмишарзава.

Багъманчиди хуьруьн майишат вилик тухунин карда куьмек гунай райодин кьилизни чухсагъул малумарзава.

«Лезги газет»