16-июндилай 23-июндалди Калужский областдин Медынь шегьерда жуьреба-жуьре женгерай (универсальный бой) итимринни дишегьлийрин арада Европадин чемпионат кьиле фена. Ана дуньядин 26 уьлкведин къуватлу спортсменри чпин алакьунар къалурна.
«Лезги газетдиз» Сулейман-Стальский райондин администрациядин пресс-къуллугъди хабар гайивал, Россиядин хкягъай командадик кваз и райондай тир Аслан Къурбановани акъажунра агалкьунралди иштиракна. Къейдзавайвал, «лайт» дисциплинада чи ватанэгьли 90 килограммдин заланвал авайбурун арада гъалиб хьана.
Аслан Къурбанован гъалибвал къизилдин медалдалди ва «Unifight» международный гьевескарвилин федерациядин дипломдалди къейдна.
«Лезги газет»
