Дагъустандин хуьруьн майишатдин хилен зегьметчийри республикада чIулав эферар (тмин) цазвай майданар кьуд сеферда гегьеншарун пландик кутунва. Идакай РД-дин хуьруьн майишатдин ва недай суьрсетдин министерстводи хабар гузва.
«2024-йисуз республикада сифте сеферда яз чIулав эферар цанай. Ихьтин теклиф Астрахандин областдай цадай тум гъайи Дагъустандин агьалидилай атана. Къунши регионда ада идалай гъейри маса адетдин тушир культураяр, гьа жергедай яз сенжефил (имбирь) ва батат (картуфдиз ухшар набатат) гьасилзава. Эферар ада ватандин чилелни гьасилун кьетIна», — лугьузва министерстводин малуматда.
Алукьнавай 2025-йисуз, къейдзавайвал, чIулав эферар цанвай майданар 5-далай 20 гектардив агакьдалди гегьеншарда. Лагьана кIанда хьи, Дагъустанда гьасилзавай чIулав эферрикай ягълу хкудунни кардик кутадай фикир ава. Инсандин сагъламвал патал иллаки хийирлу суьрсет тир чIулав эферар кьвед ва мадни гзаф йисара экъечIдай набатат я. Ам тIуьнар гьазурунин, гьакI косметикадин хилени гегьеншдаказ ишлемишзава. Набататди инсандин къуват артухарзава, иммунитет хкажзава.
ЧIулав эферрин ватан Кьиблединни РагъакIидай патай Азия ва Средиземноморье яз гьисабзава. Гегьенш майданра ам Индияда, Саудрин Аравияда, Эфиопияда, Египетда гьасилзава.
Чи мухбир
