Чирвилерин юкъуз Дагъларин уьлкведа цIийи 15 школа ачухна. Абурукай 7 йисаралди эцигна куьтягь тежезвайбур тир. Ахьтинбур ишлемишиз вахкун патал федеральный бюджетдай — 433 млн, респуб­ликадин бюджетдай 22 млн манат пул  чара авунвай.

Кьиблепатан Дагъустанда цIинин йисуз цIийи вад школа ачухнава — Ярагъ-Къазмайрал, Эминхуьре, Гелхена, Табасаран райондин Цуртил ва Хив райондин КьванцIилрин хуьрера.

Сулейман-Стальский район

Алай йисуз Чирвилерин югъ Сулейман-Стальский район патал иллаки кье­тIенди, лишанлуди ва яргъалди рикIел ала­мукьдайди хьана. ЧIехибурукай, гуьр­чегбурукай сад тир Эминхуьре 440 ученик­диз кIелдай чкаяр авай пуд мертебадин школадин цIийи дарамат ачухна. Эминхуьруьнвияр патал им гьакъикъи сувар хьана. Агьалийриз сувар мубуракиз, шад гьалара школа ачухиз, ученикриз цIийи йисан тарс-насигьат гуз иниз Да­гъустан Республикадин Кьилин ва Гьукуматдин Администрациядин руководителдин заместитель Исмаил Эфендиев, Сулейман-Стальский райондин кьил На­ри­ман Абдулмуталибов, Дагъустан Рес­пуб­­ликадин Халкьдин Собранидин Комитетдин председателдин заместитель Гьа­ми­дулагь Мегьамедов ва маса мугьманар­ атанвай. Сифте нубатда, шад мярекатрин вилик адет хьанвайвал, абуру Етим Эминан памятникдал цуьквер эцигна.

Хъсандиз безетмишнавай школадин гьаятда хуьруьнвияр — ученикар ва абурун­ муаллимар, диде-бубаяр кIватI хьанвай. Виридак шадвал ква. Инал аялри гьазур­на­вай концерт гана, абуру устаддиз кьуьлерна, манияр лагьана, 3-4-классра кIел­за­вай ученикри школадиз, муаллимриз, Ватандиз бахшнавай шиирар кIелна. Россиядин Федерациядин Гимн тамамарайда­лай кьулухъ Эминхуьруьн школадин 11-классда кIелзавай Тельман Рамазанова ва Сабина Султановади уьлкведин пайдах хкажна. ЦIийи школа ва кIелу­нин йис ачухуниз талукь митингдал райондин кьил Нариман Абдулмуталибова кIватI хьанвайбур тебрикна, эминхуьруьнвийриз цIийи школа иш­лемишиз вахкун мубаракна, и гуьрчег дара­мат эцигуник пай кутур вирибуруз сагърай лагьана, муаллимрихъ — кIвалахда, ученик­рихъ кIелунра агалкьу­нар хьана кIанза­вайди къейдна. Райондин регьберди цIи Эминхуьруьн школадиз­ сифте яз атанвай 31 аялдизни и ва­къиа му­баракна: “Къуй цIийиз ачухнавай школадай алимар, хъсан пешекарар, чIехи дережайрин руководителар гзаф акъатрай!” — къейдна ада.

Республикадин кьилин патай тебрикар гваз атанвай Исмаил Эфендиев алай вахтунда Дагъустанда образованидин хиле авай гьаларикай куьруь гаф рахана.

— ЦIинин йисуз Чирвилерин юкъуз чи республикада школайрин партайрихъ 400 агъзур аял ацукьда, абурукай 50 агъзур аял школадиз сифте яз къвезвайбур я.    1-сен­тябрдиз республикада 5000 ученикдиз чкаяр авай 15 школа ачухнава, 3000 ученикдиз чкаяр авай 9 школа эцигун гъиле кьунва, — алава хъувуна ада.

И.Эфендиев кадрийрин “Зи Дагъустан” ва “100 школа” проектрикайни рахана.­

— Алай йисуз вичин 180 йисан юбилей къейдзавай лезгийрин рикI алай шаир Етим Эминан памятникдал цуьквер эцигдайла, зи рикIел 1966-йисуз хуьре эцигиз гъиле кьур сифте кIвалерин хандакIра сифте къванер эцигдайла, заз ана иштиракун кьисмет хьайи вахтар хквезва, — лагьана Гьамидулагь. Мегьамедова. — Къе за пуд мертебадин, вичихъ алай аямдин истемишунриз жаваб гузвай спортзал, пищеблок, актовый зал галай школа ачухунин мярекатда иштиракзава. И кардал зун кьадар авачир кьван шад я. За эминхуьруьнвийриз чирвилерин ибадатхана ачухун мубаракзава, школа эцигуник еке пай кутунай Владимир Васильеваз сагърай лугьузва.

Тебрикдин келимаяр гваз мярекатдал Етим Эминан музейдин директор, хуьруьн агъсакъалрин советдин член Гьайбатулагь Манатилов, школадин диде-бубайрин комитетдин председатель Абидат Гьамидова ва масабурни  рахана.

Школада 2018-2019-кIелунин йис башламиш хьун лишанламишзавай сифте зенг 11-классдин ученик Эльман Рамазанова ва 1-классдин ученица Саибат Ражабовади яна.

Эцигунрин подрядчик “ООО Стройоригинал” компаниядин векил Ажисаид Пирмегьа­медова вичин тебрикрилай кьулухъ школадин директор Рагьман Османовав шартIунин куьлег вахкана.

Гьихьтин шад мярекат, сувар хьурай пишкешар галачир?! Школадиз райондин кьил Нариман Абдулмуталибова — компьютер ва музыкальный комбайн, Исмаил Эфендиева спортдин тадаракар багъишна.

Исмаил Эфендиева, Нариман Абдулмуталибова, Гьамидулагь Мегьамедова,  Эминхуьруьн школадин 1-класс­дин ученик Алимурад Мурадагъаева цIийи школа ачухунин лишан тир яру лент атIайда­лай кьулухъ вири гуьзел дараматдиз гьахь­на. Мугьманар ана къекъвена, тамашна, аялар чпин классра ачух тарсуна ацукьна.

Хазран Кьасумов

Мегьарамдхуьруьн район

Чирвилерин юкъуз Мегьарамдхуьруьн райондин Ярагъ-Къазмайрин агьалияр патални шадвилин вакъиа — цIийи школа ачухунин мярекат кьиле фена. Пуд сменада кIелунин къайда арадай акъудуниз талукь федеральный программадин сергьятра аваз ачухнавай и школа эцигиз 2017-йисуз башламишнай. Гила ина чкадин ва сергьятчийрин аялривай чирвилер къачуз жеда.

Школа ачухунин мярекатда райондин кьил Фарид Агьмедова, Дагъустан Республикадин культурадин ирс хуьнин Агенстводин регьбер Заур Къагьриманова, РД-да РФ-дин МВД-дин управленидин начальник Сахават Сахаватова, РД-дин Кьилин советник Мусафенди Велимурадова, кадрийрин “Зи Дагъустан” конкурсдин гъалибчи Тимур Велиханова ва масабуру иштиракна.

Аялриз алай аямдин гегьенш школада чирвилер къачудай мумкинвал гунай Фарид Агьмедова Россиядин Президентдиз ва Республикадин кьиле авайбуруз сагърай лагьана, и кардик чкадин агьалийри кутур пайни къейдна. Ада чIехи жезвай несилди хъсан чирвилер къачун патал къулай шартIар арадал гъунин чарасузвиликайни лагьана. Эхирдай Фарид Агьмедова ярагъвийрив ДГТУ-дин ректор Тагьир Исмаилован патайни чими келимаяр-тебрикар агакьарна.

Заур Къагьриманова кIватI хьанвайбур Дагъустандин Кьилин патай тебрикна. КIелу­нин цIийи йисан вилик аялрик Сахават Сахаватова, Тимур Велиханова ва амай мугьманрини руьгь кутуна.

Концертдилай, мугьманри авур тебрикрилай кьулухъ школа ачухунин лишанлу лент атIана ва мугьманар школада — кабинет­ра, спортзалда, столовойда, актовый залда къе­къвена. Аялар и вахтунда чпин классра ацукьнавай, муаллимри тарсариз тади ийизвай.

Школа алай аямдин техникадин такьатралди таъминарнава. Ина ученикар, муаллимар патал вири шартIар тешкилнава.

Директордин кабинетда мугьманри махсус журналда чпин фикирар, тебрикар кхьена­­­.

Абуру школадин гьаятрани сейрна. Ина хъсандиз тадаракламишнавай спортдин са шумуд майдан, аялар къугъвадай майдан ва ял ягъун патал гъвечIи багъ туькIуьрнава.

Чи мухбир

Кьурагь район

Чирвилерин юкъуз Кьурагь райондин ­Гелхенрин хуьруьн школадин ракIарарни шад гьалара ачухна. Гзаф йисара эцигиз хьайи ам ишлемишиз вахкана. Гъилера цукь­верин  кIун­чар, кIула портфелар авай ая­ларни гележегдин несил тербияламишунин къастунал алай муаллимар цIийи школадиз фена.

Шадвилин мярекатда РФ-дин Госду­мадин депутат Абдулгьамид Эмиргьамзаева, РД-дин Халкьдин Собранидин депутат Сейфулагь Исакьова, РД-дин Арбитражный суд­дин председатель Абумуслим Алиева, “Да­­гъустандин энергосетевая компания” АО-дин директор Муртазали Гитинасулова, РД-дин МЧС-дин министрдин заместитель Жаруллагь Моллаева, “Альянс” ООО-дин регьбер Абдул Мирзебутаева, райондин виликан кьил Даир Эмиргьамзаева, Гелхенрин хуьруьн кьил Умалат Гьайдарова, райадминистрациядин векилри ва масабуру иш­тиракна.

100 ученикдиз кIелдай чка авай школа ачухунин лишанлу яру лент Абдулгьамид Эмиргьамзаева, Сейфулагь Исакьова, райондин образованидин отделдин начальник Рамазан Катибова, Гелхенрин школадин директор Рамазан Рамазанова атIана.

А.Эмиргьамзаева ва анал рахай масабуру и школа эцигна куьтягьиз куьмекай Да­гъус­тандин Кьилин везифаяр вахтуналди тамамарзавай Владимир Васильеваз сагърай лагьана, гелхенвийриз сувар мубаракна.

Чи мухбир

Ахцегь район

1-сентябрдиз, Чирвилерин  юкъуз­, гьукуматдин регьберарни къулугъчияр мектебриз мугьман хьун хъсан адетдиз элкъвенва. И сеферда Ахцегь райондин кьил Осман Абдулкеримов вичин заместитель Алмас Шуаев, райсобранидин председатель Абдулкерим Палчаев, образованидин управленидин начальник Алмас Гьажиев галаз Ахцегьрин умуми образованидин 1-нумрадин школадиз мугьман хьана. Чирвилерин йикъан шад мярекатда гьакI РД-дин государстводин закупкайрин Комитетдин председателвилин везифаяр тамамарзавай Жафар Гьажибегова ва маса юлдашри иштиракна.

Аялриз сувар мубаракуналди ва мугьманар тебрикуналди, мярекат школадин директор Сафинат Мамаевади ачухна ва гаф муниципалитетдин кьил О.Абдулкеримоваз гана.

— Заз къе гъиле цуьквер аваз, цIийи парталар алаз сифте яз школадиз атана, партайрихъ ацукьдай гъвечIи аялриз и югъ мубаракиз кIанзава. Къуй квез школадикай кьвед ла­гьай кIвал хьуй! Хушбахт гележег чна квехъ галаз алакъалу ийизва. Дерин чирвилер ва хъсан тербия къачудай къулай шар­тIар яратмишун патал чун алахъзава. ИкI, рай­ондин вири школаяр ремонтнава, хатасузвал таъминарунин серенжемар кьабулнава. Муштулухдин хабар: чи баркаллу рухваяр — меценатар тир Абдулкерим Палчаеван ва Феликс Байрамован куьмекдалди цIи Ахцегьрин 1-нумрадин ва Къурукаларин хуьруьн школаяр республикадин “100 школа” программадик акатна, дуьзмишзава. 11-классдин жаванриз, агалкьунралди ЕГЭ вахкана, пешекарвилин кьилин ва юкьван чирвилер къачудай мумкинвилер хьурай! Къуй муалимриз чандин сагъвал, аялрихъ галаз жавабдар ва  четин кIвалахда агалкьунар хьурай, —  алава хъувуна Осман Абдулкеримова.

Жафар Гьажибегова вичин ва республикадин руководстводин патай аялризни муаллимриз Чирвилерин югъ рикIин сидкьидай мубаракна. “Сад лагьай классдин аялриз ина цIийи дустар жагъида, сифте муаллимривай кхьиз-кIелиз чир жеда. Выпускникрин вилик пеше хкягъунин, ЕГЭ вахкунин, чIехи уьмуьр­диз кам вегьинин жа­вабдар везифаяр ква. Къуй квез и рекье чандин сагъвал ва агалкьунар хьурай!”, — къейд­на ада.

Аялрихъ, абурун диде-бубайрихъ ва муаллимрихъ элкъвена, кIелунин цIийи йис ва Чирвилерин югъ тебрикунин хуш келимаяр муаллимри, аялри ва абурун диде-бубайрини лагьана.

Шадвилин линейка 1-классдин ученик Гуьлемет Даниялова, кIелунин 2018-2019 йисав эгечIунин лишан яз, сифте зенг ягъуналди ва школадин гьевескар артистрин музыкадин нумрайралди давам хьана.

Ихьтин шад мярекатар и юкъуз, райадминистрациядин, РУО-дин ва общественностдин векилрин иштираквал аваз, райондин вири школайра тешкиллувилелди кьиле фена.

Дашдемир Шерифалиев

       Докъузпара район

Уьлкведин вири мектебра хьиз, 1-сентябрдиз Докъузпара райондин вири хуьрерин мектебрани Чирвилерин югъ къейдна.  Адет яз, Чирвилерин югъ муаллимрин, диде-бубайрин, аялрин иштираквал аваз кьиле тухузва. Мектебдиз сифте камар вегьезвай ая­лар патал и югъ иллаки рикIел аламукьдайди я.

Докъузпара райондин кьил Абдурагьим Алискерова ЦIийи Къаракуьредин мектебда кьиле фейи шад мярекатда иштиракна. Райондин кьили акьалтзавай несилдиз чирвилер, тербия гузвай муаллимриз агалкьунар хьун алхишна, аялриз ва кIватI хьанвай вирибуруз сувар мубаракна.  Ада аялар ОГЭ-диз ва ЕГЭ-диз хъсандиз гьазурунин важиблувиликайни ихтилатна.

— Мектебда кIелзавай гьар са аялди, масадан куьмек галачиз, ЕГЭ вахкун, кар патал­ хъсандиз кIелун ва анжах жувак умуд кутун лазим я. Муаллимри лагьайтIа, аялри имтигьанар агалкьунралди вахкун патал алахъунар авуна кIанда, — лагьана А. Алискерова.

Ада сад лагьай классдиз камар къачузвай аялриз вичин патай савкьатарни гана.

Мярекатда райондин образованидин управленидин начальник Гъвейибег Шагьвеледова, Россиядин МВД-дин “Ахтынский” МО-дин начальник Руслан Хаспулатова, Докъуз­пара райондин кьилин заместитель Салигь Гьажимурадова, ЦIийи Къаракуьредин администрациядин кьил Гуьлмегьамед Парванаева ва масабуру иштиракна.  Абуру аялриз, муаллимрин дестедиз кIелунин цIийи йисуз агалкьунар хьана кIанзавайди лагьана.

Шад мярекатар Къалажух, Миграгъ, Къуруш, Миграгъ-Къазмаяр, Усугъчай, Мискискар, Авадан, Къаракуьре хуьрерин мектебрани кьиле фена. Анра райондин администрациядин ва образованидин управленидин  векилрини иштиракна.

Мярекатра аялри Чирвилерин йикъаз талукьарнавай манияр тамамарна, шиирар кIел­на ва итижлу нумраяр къалурна. Мярекатрилай кьулухъ муаллимри тухвай сад лагьай тарс, адет тирвал, ислягьвилиз талукьарна.

Шак алач хьи, алай девирда акьалтзавай несилдиз чирвилерни тербия гунин кIва­лах гзаф важиблуди, жавабдарди я.

Куругъли Ферзалиев