Россияди СВО кьиле тухуз эгечIай чIавалай квадрокоптерар ва цавай лув гудай, яргъал мензилдай идара ийидай маса аппаратар машгъулатдин ва я къиметлу игрушкаяр яз амукьнач. Дагъустанда, сергьятдин маса регионра хьиз, пилот галачиз лув гудай аппаратар ишлемишунал къадагъа ала. И къадагъадал амал тавурбур 20 агъзур манатдилай 50 агъзур манатдал кьван жерме ийида. Эгер цава БПЛА акуртIа, полициядиз ва я 112-нумрадиз зенг авун герек я.
Амма гьамиша икI жезвач. Къадагъайризни килиг тавуна, инсанар авай чкада дронди лув гуз хьайитIа, мумкин я, им жаванри къанун чIурзавай ва я кино гьазурзавайбур чпин кардал машгъул дуьшуьш я. Ихьтин чIавуз дрондин иеси жагъурун ва адавай ихтияр ганвайвилин гьакъиндай документ тIалабун лазим я. Эгер иесиди вич къурху гудай жуьреда тухуз хьайитIа, ихьтин макъамда полициядиз зенг авуна кIанда.
Дронар ягъунни къадагъа ийизва. Эгер дронди цавай къанундин бинедаллаз лув гузватIа, къастуналди эменни тергунай ва я адаз зарар гунай уголовный жаза ава. Ихьтин затIарин мукьув агат тавунин патахъай тагькимарзава.
«Лезги газет»
