Гзаф дуьшуьшра яшлу ин­санрин зигьин зайиф жеда. И вахтунда агъадихъ галай рецептдикай менфят къачуда: кьил чичIек ра­кьай яна, жунадик кутуна, миже хкудда. Ахпа адак гьа мижедин кьадарда вирт хуькуьрна, йикъа пуд сеферда фу нез са сят амайла, хуьрекдин са тIуруна авайди ишлемишда.

—        Са кьил серг куьлуь авуна, аниз са истиканда авай михьи тавунвай семечкадин ягълу яна, са суткада холодильникда хуьда. Ах­па адак лимондин (сад хьтин па­яр) миже акадарна, йикъа пуд сеферда, фу нез 30 декьикьа амайла, чайдин са тIуруна авайди ишле­мишда. Сагъарунин вахт пуд варз я. Са вацра ял яна, курс тикрар хъийида.  И къаришмади нефес бес тахьуниз куьмекда.

—        Хуквада хер (гастрит) авай инсанриз афнияр тIуьн къадагъа ­ийизва. ГьикI лагьайтIа, афнидин мижеди кислотность хкажзава.

—        Эгер йикъа 5 истикандилай гзаф михьи яд хъвайитIа, рикIин ­приступ хьунин хаталувал тIимил же­да. ГьикI лагьайтIа, ци иви кьери ­ийизва.

—        Гъилер, кьил зурзазвайла (болезнь Паркинсона), агъадихъ галай рецептдикай менфят къачуда: 2 г прополис (са таблеткадин кьадар) экуьнахъ ва нянихъ фу тIуьр­далай гуьгъуьниз жезмай кьван геждалди жакьвана, цуь­кIуьн мукьвал-мукьвал туькьуьнда. Ам гзаф хийирлу я. Кьве гьафтедилай прополисдин кьадар кьве сеферда тIимиларда ва ам жакьун­ давамарда. Сагъарунин вахт са варз я.

Кьве гьафте ара гана, курс мад тикрар хъийида.

—        Бедендиз къуват атун ва гьакIни сагъламвилиз хъсан таъсир авун патал са килограмм газарар (чкал аламаз), гьакьван кишмишар чуьхвена, михьи авуна, абурал 8 ис­тиканда авай яд илична, 5 сятда зайиф цIал эцигна тада (ргана виже къведач). Ахпа ам куьзна, йикъа пуд сеферда 1/3 истиканда авайди ишлемишда.

—        Астма авайла, жумун 4 -5 пеш истикандиз вегьена, ргазвай яд илична, экуьналди тада. Ахпа ам куьзна, чими авуна, нефес дар  хьанвайла, хъвада. 5 декьикьадилай нефес гуьнгуьна гьат хъийида ва дамарра хкаж хьанвай ивидин гьерекат агъуз аватда.

—        КIвачер дакIунвайла, са пакетда авай кьел це цIурурда, ахпа къаришмадай дасмал кьежирна, юкьвал эцигна, чими шарфуналди кутIунда. Дасмал чими хьайила, мад кьежир хъувуна, юкьвал эхцигда. Са шумуд сеферда икI авурдалай гуьгъуьниз кIвачерин дакIун алатда.

—        Кьил элкъвезвайла, 1/2  истиканда авай куьлуь авунвай чи­чIек­диз 1/2 истиканда авай кьери вирт яна, хъсандиз хуькуьрда. Ах­па фу нез зур сят амайла, хуьрекдин са тIуруна авайди ишлемишда. Ам иллаки апрелдиз ва сентябрдиз ишлемишун хийирлу я.

—        Ксудалди вилик чIутран цуькверин чай хъвайитIа, йифиз хъсан ахвар къведа. Ам икI гьазурда: хуьрекдин са тIуруна авай апте­кадай маса гузвай чIутран цуькверал (ромашка) 1 л ргазвай яд илична, 15 декьикьада тада. Ихьтин  чай­ди ратарин кIвалахни хъсанарда.

“Айболит” газетдай.

Гьазурайди — Надият  Велиева