Мукьвара Махачкъала шегьердин 42-нумрадин школада лезгийрин тIвар-ван авай шаир, беглеринни ханарин аксина экъечIай бунтчи, женгчи Кьуьчхуьр Саидан 250 йис тамам хьуниз талукьарнавай мярекат кьиле тухвана. Мектебдин лезги чIалан муаллим Абдурашидова Мегьри кьиле аваз 5, 6, 7-классрин аялри и мярекатдиз хъсандиз гьазурвал акунвай. Иниз мектебдин аялар, муаллимар, диде-бубаяр, авар, дарги ва маса миллетрин векиларни атанвай.
Мярекат чи классик Етим Эминан чIаларалди ачухна:
Хажалатар, хифетар зи дерин я,
Заз алахьай гуьлуьшан югъ серин я,
Вил атIудач дуьньядихъай, ширин я,
Айиб мийир, инсан я лагь дустариз…
8-классдин ученица, вич кьуьчхуьрви ашукьдин невейрикай сад тир Къужаева Лейлади ва мярекатдин руководитель Абдурашидова Мегьриди мярекатда иллаки еке активвал ва устадвал къалурна.
Вичин ери-бине Ахцегьай тир 5-“д” классдин ученик Жалилов Мурада тамамарай “Чубарук” мани атанвайбуруз гзаф бегенмиш хьана. 7-классдин ученицаяр тир Мамедгьуьсейнова Заиради, Загьирова Дианади, Шихкеримова Каринади Саидан чIалариз кхьенвай “Шикаят” мани тамамарна. Устадвал къалурай аялар гзаф я, вирибурун тIварар кьаз жезвач. Мярекат ашукьдин чIалариз кхьенвай манийри, авур кьуьлери метлеблу авуна.
Эхирдай завуч Эльвира Мегьамедовнади аялриз сагърай лагьана ва хъсандиз иштиракайбуруз гьуьрметдин грамотаяр гана.
