Уьнуьгъви алим

Новосибирскда яшамиш жезвай ва ана кIвалахзавай лезги алим, биологиядин илимрин доктор, “вирусология” пешедай доцент Азаев  Мамедьяр  Шакировичан  илимдин агалкьунрикай мукьвара за интернетдин сайтрай кIелна. ­Гуьгъуьнлай зун адахъ галаз интер­нетдин куьмекдалди алакъадал экъечI­­на…

Азаев Мамедьяр Азербайжан республикадин КцIар райондин Уьнуьгърин хуьре дидедиз хьана. 1986-йисуз ада ветеринариядин факультет тафаватлудаказ куьтягьна.

Ам РФ-дин здравоохраненидин министерстводин Роспотребнадзордин Гьукуматдин вирусологиядинни биотехнологиядин илимдин “Вектор” центрадин хаталу вирусрихъ галаз кIвалахунин рекьяй духтурар ва биологар гьазурдай илимдинни методикадин отделдин заведующий, гьакIни и центрадин алимрин советдин член, Новосибирскдин гьукуматдин университетдин эвелимжи (бинедин)  медицинадин кафедрадин преподаватель я.

Алимди чIижерин зегьердик квай вирусриз акси затIар, эцигунар патал полимердин цIийи материалрин токсикологический такьатар ахтармишнава.

Иммунобиологический ва дарманрин такьатар арадал гъидайла, GIP-дин (лабораториядин тежриба) къайдаяр кардик кутунин ва хейлин маса месэлаярни ахтармишнава.

Мамедьяр Шакировича 2010-йисан 23-апрелдиз “Новые подходы к разработке противотуберкулезных средств и их биологическая активность” темадай, “биотехнология” пешедай агалкьунралди биологиядин илимрин докторвилин диссертация хвена.

Ам цIудралди илимдин метлеблу кIвалахрин (бязибур къе­цепатан чIаларални чапнава)  автор я. Машгьур алимдин илимдин ­кIва­лах­рикай инал бязибурун тIварар кьуртIани жеда: “Надлежащая прак­тика производства GMP Project thesis: практические рекомендации по внедрению GMP” (2003), “Полный курс специали­зации и усовершенствования врачей и биологов по особо опасным инфекциям (2005), “Генотипический полиморфизм клинических штаммов микобактерий туберкулеза, циркулирующих на территорий ­Новосибирской области” (2005). Алимди маса алимрихъ галаз санал авунвай ахтармишунрин, чапнавай илимдин кIвалахрин кьадарни гзаф я. Са кьадарбурухъ галаз интернетда таниш жедай мумкинвални ава.

Ада МНТЦ-дин (Международный научно-технический центр) илимдин хейлин проектрани иштиракзава.

ТIвар-ван авай лезгидихъ сагъвал ва мадни еке агалкьунар хьурай!

«Лезги газет»