Куь ихтиярар

Коронавирусдихъ галаз алакъалу яз кардик кутунвай кьезилвилер (льгота) алай йисан 1-апрелдилай къуватда амукьдач. ЦIийи йисахъ галаз алакъалу яз 8 йисал кьван яшда авай гьар са аялдиз талукьарай 5 агъзур манат къачун патал арза вугудай вахтни 1-апрелдиз акьалтIнава.

1-апрелдилай аялриз гузвай такьатарни, яшайишдин пенсияни хкаж хъхьанва. Кьилди лагьайтIа, яша­йишдин пенсияр 3,4 процентдин артух хъувунва. Та­кьат­­рин юкьван кьадар 10183 манатдал кьван хкаждайвал я.

“Бюджетдин кьитвилизни килиг тавуна, ватандашрин вилик яшайишдин вири мажбурнамаяр тамамарда. Им гзаф важиблу месэла я. Идалай вилик РФ-дин Президентди резервар арадал гъун патал кьабулай серенжемри чаз инсанрин тереф хуьнин, ватандашриз яшайишдин рекьяй куьмекунин вири месэлаяр гьялдай мумкинвилер гузва”, — къейдна Госдумадин Председатель В.Володина.

65 йисалай виниз яшар хьанвай къуллугъчийри мензил хвена (удалёнка) кIвалах давамарун чарасуз яз амукьдач — и месэла идарадин, тешкилатдин кьиле авай жавабдар касди гьялда.

1-апрелдилай пIапIрусрин са кьватидин агъа кIанин къиметдин кьадар 107 манатни 78 кепек яз тайинарна­ва­. Акциздин кьадарни, НДС-ни фикирда кьуналди, пIапIрусрин къимет РФ-дин хуьруьн майишатдин министерстводи тайинарнава.

Дегишвилеризни цIийивилериз талукь делилар РФ-дин талукь тир ведомствойри, РД-дин МФЦ-дин кьилин идаради раижнава.

«Лезги газет»