12-сентябрдиз Махачкъаладин кьилин майдандал, «Чи кIвализ — ислягьвал» лишандик кваз, диндин международный дережадин форум кьиле фида. Идакай «Дагъустан» РИА-ди хабар гузва.

Форумдин кIвалах вад секциядиз пайна тешкилдайвал я: «Садвал ва хатасузвал», «Авадан жезвай макан», «Мягькем хизан — сагълам жемиятдин бине», «Яшайишдин рекьяй куьмек гун» ва «Исламда хайи чилихъ авай кIанивал ва ватанпересвилин гьиссер». Анал экстремизмдин, радикализмдин вилик пад кьунин, Исламдин гьакъикъи ивиррал амал авунин, мергьяматлувилин фондари жуьреба-жуьре серенжемра иштиракунин ва маса месэлаяр веревирдда.

Мярекат Сергей Меликованни Дагъустандин муфтиятдин куьмекдалди тешкилзава. Ана Россиядин регионрин ва са жерге къецепатан уьлквейрин муфтийри, диндин машгьур алимри, РФ-дин Президентдин Администрациядин векилри ва масабуру иштиракда.

Форум нянин сятдин 7-дан зураз гатIунда ва ана ашкъи авай гьар садавай иштиракиз жеда.

«ЛГ»