Алатай гьафтеда Саха республикадин Якутск шегьерда азаддаказ кьуршахар кьунай Олимпиададин, дуьньядин 3 сеферда чемпион, СССР-дин спортдин лайихлу мастер Павел Пинигинан гьуьрметдай «Якутиядин ракьун рекьер» АО-дин призар патал 18 йисал къведалди яшара авай жегьилрин арада кьиле тухвай международный турнирда Къиргъизистандай, Къазахстандай, Белоруссиядай, Тажикистандай, Монголиядай, гьакI чи уьлкведин са жерге регионрай, гьа гьисабдай яз Дагъустандай тир 18 йисал къведалди яшара авай 700-далай виниз спортсменри чпин устадвал къалурна.
Къизгъиндаказ ва итижлудаказ кьиле фейи бягьсера къизилдин медалар къазанмишайбурун арада чи ватанэгьлияр Агъаширин Агъаширинов (48 кг-дал къведалди заланвал авайбурун арада), Алимирза Абдулкъадиров (92 кг-дал къведалди заланвал авайбурун арада) ва Рагьман Мелагьмедов (110 кг-дал къведалди заланвал авайбурун арада) ава.
РикIел хкин: винидихъ тIварар кьунвай пуд спортсмендини алай йисан гатфариз 17 йисал къведалди яшара авай спортсменрин арада Россиядин кIвенкIвечивал патал акъажунра къизилдин медалар ва идахъ галаз сад хьиз, и йикъара Туьркиядин Стамбулда кьиле фидай дуьньядин кIвенкIвечивал патал акъажунриз путёвкаяр къазанмишнава.
Рагнеда Рамалданова
