Украинада кьиле тухузвай военный махсус серенжем давам жезва. Луганскдин Халкьдин Республика тамамдиз­ миллетбазрикай азаднаватIани, Донецкдин Халкьдин Республикадин са бязи шегьерра, хуьрера абуру агъавалза­ма. Гьа са вахтунда Россиядин Федерациядик экечI хъувунвай Запорожьедин, Херсондин областрин, Донбассдин мулкариз НАТО-дин ракетайрай, тупарай са къатда гуьлле­ гузва. Эхиримжи гьафтейра абуру датIана гьужумдин гьере­катарни ийизва. Амма махсус серенжем тухузвай сад авунвай кьушунри душмандин гьужумар тахьай мисалзава. Алай вахтунда Николоев шегьердилай гатIунна Харьковдал кьван авай шегьерра, хуьрера женгер кьиле физва­. Ил­лаки Херсондин­ областдин Трифоновка, Безыменный, Ни­колаев областдин Нововоскресенск, гьакI Бахмут, Соле­дар, Угледар, Лиман, Северск, Сумы, Изюм, Белогоровка ше­гьеррин къваларив арадал атанвай гьалар регьятбур туш. НАТО-дик акатзавай уьлквейрай атанвай офицерри регьбервал гузвай легионеррин куьмекни галаз неонацист­ри гьужумдин гьерекатар акъвазарзавач. Гьелбетда, чи сад авунвай кьушунри абурун вири алахъунар тахьай мисалзава.

9-октябрдиз сад авунвай кьушунрин командующийвиле армиядин генерал Сергей Суровикин тайинарна. 10-октябрдилай Украинадин вири мулкара энергетикадин имаратар, коммуникацияр, важиблу  къурулушар тупарай,  ракетайрай ягъиз гатIунна. Винидихъ чна къейд авунвай вири мулкарани Донбассдин мулкар фашистрикай, террористрикай тамамвилелди азад авун патал  къизгъин женгер кьиле физва. Военный серенжемра иштиракзавай да­гъус­танвийри жуьрэтлувал, викIегьвал къалурзава. Къе чна са шумуд касдин игитвилерикай ихтилатда.

Кьушунар герек суьрсетдалди таъминарзавай ротадин водитель-электрик Саид Мегьамедова женгер кьиле физвай майданра авай Россиядин частариз яракьар агакьарзава. Са шумуд сеферда ам душмандин тупарин цIукни акатна. Вичин кар лап хъсандиз чизвайвиляй ва чкадин кьетIенвилерай кьил акъудиз алакьзавайвиляй ада вичин автомашин саламат чкадиз акъудзава. Нубатдин сеферда Саид квай чи колонна мад миллетбазрин артиллериядин ягъунрик акатна. Гуьлле галукьай вилик квай автомашинди цIай кьуна. Саид Мегьамедова арадал атай гьалдай гьасятда кьил акъудна, цIай кьунвай машиндай хер хьанвай пуд аскер ахкъудна, абуруз сифтегьан куьмек гана ва ахпа вичин машинда аваз гуьллеяр агакь тийизвай майдандал ахкъудна.

Кьибледин военный округдин мотострелковый дивизиядин ротадин командир, лейтенант Нурали Мирзоева Украинадин кьушунри далу пата авай объектриз артилле­риядай ягъунар кьурла, аскерар къутармишун патал тади гьалда герек серенжемар кьабулна ва вичин гъилик квай са аскерни хкатдайвал авунач. Командирвилин везифаяр гъавурда аваз ва викIегьвилелди кьилиз акъудзавай лейте­нантдин гьунарар гьукуматдин шабагьдалди къейднава.

Мотострелковый батальондин командир, капитан Дереник Темирханова миллетбазрикай нубатдин хуьр азад ийидайла, арадал атанвай гьал фикирда кьуна, душмандиз гзаф зиянар гудайвал ягъунар кьун тешкилна. Гьа са вахтунда душмандин минометрин расчетриз цIай гана, чи аскерриз виликди фидай мумкинвал яратмишна. Кьуд сятда давам хьайи женгина, душмандин аскеррин артухан кьадардизни килиг тавуна, абур кьулухъ чIугуниз мажбурна­. Душмандин цIуд бронетехника къайдадикай хкудна, 100 миллетбаз тергна. Гьа ихьтин гьерекатралди хуьр азадна.

Залпдин жуьреда цIай гудай “Ураган” дестедик квай сер­жант Мусайиб Умарова Украинадин неонацистрин сен­ге­р­рал гьужумзавай Россиядин тактикадин батальонрин дестедиз виликди физ куьмек гун лазим тир. Тапшуругъ ре­гьят­ди туширтIани, сержантди вичин гъилик квай аскеррихъ галаз­ душмандин мягькемарнавай пункт дуьздаказ яна ва яракьар­, военный суьрсет хуьзвай склад, цIудалай виниз миллетбазар ва военный кьве автомашин тергна. Нетижада душмандин фашистар, яракьарни туна, катуниз мажбур хьана.

Россиядин десантникрин тактикадин батальондин дестедик квай сержант, пияда кьушундин женгинин машиндин наводчик-оператор Рашид Аскароваз, азаднавай са поселокдай фидайла, чкIанвай са дараматдай душмандин чир тежедайвал кIеви хьанвай яракьар гвай десте акуна. Сержантди, са эглешвални тавуна, дуьм-дуьз лишандиз къачуна, БМП-дин тупунай  яна ва неонацистар къирмишна. Кьунвай чкайрай боевикриз рум гудайла Аскарова душмандин БМП ва вад аскер тергна. Са шумуд югъни арадай фенач, сержант Рашид Аскеров авай подразделениди десантникрин гьужумдин ротадихъ галаз душмандин мягькемарнавай пункт къачудай женгина иштиракна. Душманди лап пехъивилелди аксивал къалурзавай, Россиядин дестедиз гзаф зиян гун патал гранатометрай, лишанчивилин яракьрай ва ПТУР-рай гуьлле гузвай. Сержант Аскаров кьиле авай десантникрин дестеди, чи минометрай миллетбазриз цIай гайидалай гуьгъуьниз, къулай терефдихъай гьужумна ва мягькемар­навай пункт хуьзвай боевикрикай хейлинбур къирмишна. Гъавурда аваз тешкилай гьужумди душмандин цIай гузвай чкаяр тергдай мумкинвал гана. Аскарова вичин БМП-дин тупунай яна муьжуьд неонацист телефна.

Хиийр Эмиров