Са йисалай виниз я Украинада женгинин гьерекатар (СВО) кьиле физ. И махсус серенжемда СтIал Сулейманан райондайни, офицерар, икьрардин бинедаллаз къуллугъзавайбур ва мобилизациядик акатайбур яз, 300-далай виниз кьегьалри иштиракзава, дирибашвилер къалурзава. Ихьтинбурукай сад Герейханован хуьряй тир икьрардин бинедаллаз къуллугъзавай Ягъибегов Заур Наврузович я. Жегьилдихъ галаз зун и йикъара мукьувай таниш хьана.
– Гьуьрметлу Заур Наврузович, сифтедай чаз вуна газет кIелзавайбур ви уьмуьрдин рекьихъ галаз танишарна кIанзавай.
— Зун Герейханован хуьре 1998-йисан 21-январдиз дидедиз хьана. За анин 1-нумрадин юкьван мектебда 9-класс акьалтIарна, Ульяновск шегьердин физкультурадин техникумдик экечIна. Гуьгъуьнлай Дербентда ДОСААФ-дани кIелна. 2018- 2019-йисара Крымда флотда къуллугъна. Адалай гуьгъуьниз Ростовдин областда икьрардин бинедаллаз армияда къуллугъун давамарна.
– Махсус серенжемда мусалай иштиракзава?
— Гьа сифте йикъалай. Зун младший сержант, медицинадин отделенидин командир я. Чи военный частуни алай вахтунда Донецкдин областдин Маленка шегьердин патарив махсус серенжемда иштиракзава.
…Са сеферда чна женг кьиле физвай майдандилай хирер хьанвай аскерар хатасуз чкадиз хкизвай. И арада Украинадин патай гуьлле гана. Зал хер хьана, гуьллейрикай хатасуз чкадиз катиз агакьнач. 14 юкъуз зун Ростовдин, 14 юкъуз Анападин госпиталра хьана. Сагъар хъувурдалай кьулухъ отпускдиз кIвализ ахъайна. Мукьвара зун жува къуллугъзавай частуниз хъфидайвал я.
– Ватандиз хтайла, ви дерди-гьалдикай хабар кьунани?
— Эхь, зун общественный хатасузвал хуьнин рекьяй райондин администрациядин кьилин заместитель Абуталиб Бабаевич Фатулаева кьабулна. Зи ва хизандин дерди-гьалдикай, кIанзавай куьмекрикай хабарар кьуна, захъ галаз яргъалди ихтилатар авуна, ватанпересвал къалурунай чухсагъул лагьана.
Захъ галаз Герейханован хуьруьн администрациядин кьил Руслан Алиевич Алдыровани гуьруьш кьиле тухвана, дерди-гьалдикай хабар кьуна. Сагърай чеб!
– СВО-да вуна женгинин гзаф гьерекатра иштиракнани?
— Луганскдин терефда женгинин серенжемра гзаф хьана. Заз жувалай тариф ийиз кIандайди туш. ЯтIани лугьун: захъ женгера къалурай кьегьалвилерай ганвай «За боевое отличие» медаль ава. Кьвед лагьай шабагь гун патал зи документар отпускдиз хкведалди гьазурнавай. Орден яни, медаль яни заз чидач. Хъфейла чир жеда.
– Донбассда икьрардин бинедаллаз къуллугъзавайбур, мобилизациядин сергьятра аваз СВО-диз фенвайбур гьикI кьабулзава?
— ЧIехи паюни — лап хушдаказ. Гзафбуру, «Наши спасатели» лугьуз, чи аскеррин гарданар кьада. Чи есирда гьатай Украинадин гзаф офицерри ва аскеррини чпиз Украинадиз хъфиз кIанзавач лугьузва. Медицинадин рекьяй сифте куьмек, тIуьн гузвай СВО-дин иштиракчийрилай абур рази я. Украинадиз хъфейтIа миллетчийри чеб яна рекьида лугьузва.
Чи аскеррихъ садвал, дуствал, инанмишвал ава. Чи кар гьахълуди я. Гьавиляй чун гъалибни жеда.
– Заур Наврузович, бязи диде-бубайриз армиядиз тухвай жегьилар СВО-диз рекье тунин патахъай кичIевал ава. Гьакъикъат гьихьтинди я?
— Шаз ва алай йисан гатуз Россиядин Яракьлу Къуватрин жергейриз эвер гайи гьич са касдини женгинин махсус серенжемда иштиракзавач. И кар къанундалди къадагъа я. Эгер жегьилдиз СВО-да иштиракиз кIан хьайитIа, адавай и кар къуллугъдин 1 йисан вахт куьтягь хьайила, икьрар кутIунна, кьилиз акъудиз жеда.
– Вуна гележегдин планрикайни лагьанайтIа, кIанзавай.
— Махсус серенжем куьтягь хьайила, кIвализ хтана, мехъер авун. КIани рушни ава. Ахпа зун высший военный училищедик экечIда.
– Вун ви мурадрихъ агакьрай, гьуьрметлу Заур!
Хазран Кьасумов
