Дуьньядин винел, Дагъустанда хьиз, са шумуд миллет санал, стхавилелди яшамиш жезвай гьукумат мад алач жеди. ЮНЕСКО-дин делилралди, гьар вацра чилин винелай кьве чIал квахьзава. Хайи чIалар квахьунин хаталувал авай девирда дидед чIалан, кьилди къачуртIа, лезги чIалан къайгъу чIугун гьар са лезгидин эвелимжи буржийрикай я.
Чи мурад халкьдин хазина тир чIал гьар са касди виридалайни багьади тирди аннамишун я. Хейлин чIалар терг жезвай макъамда абур хуьнин ва вилик тухунин мураддалди 1999-йисуз ЮНЕСКО-дин Генеральный конференцияди 21-февраль Виридуьньядин халкьарин чIаларин югъ яз малумарна. А чIавалай инихъ 23 йис алатнава. Гила жуьреба-жуьре миллетриз руьгьдин виридалайни девлетлу ивиррикай сад тир хайи чIалан югъ къейддай мумкинвал хьанва.
Гьар йисан февралдин вацра Къурушрин хуьруьн 1 ва 2-нумрайрин юкьван мектебра, адетдиз элкъвенвайвал, лезги чIаланни эдебиятдин гьафтеяр кьиле тухузва. А гьафтеда лезги чIаланни эдебиятдин муаллимри ачух тарсар, классдилай къеце мярекатар тешкилзава, мектебра олимпиадаяр тухузва.
Ингье алай йисан 19-февралдиз Къурушрин хуьруьн 1-нумрадин юкьван мектебдин фойеда аялар, муаллимар, хуьре лезги чIалаз гьуьрметзавай, адан тереф хуьзвай агьалияр кIватI хьанва. Лезги чIалаз талукьарнавай мярекат 1-нумрадин юкьван мектебдин тербиядин рекьяй завуч Акбарова Рубабе Лукьмановнади ачухна, мубаракна. Директор Гьажиметов Ислам Надировича кIватI хьанвайбуруз маналу сувар мубаракна, “Къуруш” тIвар алай шиир кIелна. Гуьгъуьнлай гаф лезги чIаланни эдебиятдин муаллим, Хасавюрт райондин гьуьрметлу агьали — и цIарарин сагьибдиз гана ва лезги чIалакай, ам авай гьалдикай гегьенш доклад авуна.
Мярекатда, мектебрин аялрилайни муаллимрилай гьейри, лезги газетарни журналар кхьин патал гьамиша таблигъат тухузвай, лезги чIалаз гьуьрметзавай хуьруьн агъсакъалрин советдин председатель Вердиханов Вердихана, общественник, агъсакъал Эмиров Эмирхана, Рамазанова Гуьльятан тIварунихъ галай фондунин векил Къулиев Марлента, хуьруьн имам Панагьов Азим гьажиди, Хасавюрт шегьерда авай педучилищедин ингилис чIалан муаллим-таржумачи Алхасов Насира, Хасавюрт райондин депутатрин собранидин депутат хьайи Юсупов Медагъади, 2-нумрадин юкьван мектебдин лезги чIаланни эдебиятдин муаллимрин МО-дин руководитель Назарова Ренади, социальный педагог Лазимов Акифа, хуьруьн библиотекадин заведующий Шагьпазова Сулмаза, муаллимар тир Гьасанов Сейфуллагьа, Мамедов Элескера, Дадашева Эрзиди иштиракна. Абуру акьалтзавай несилдиз лезги чIал хуьниз, адаз гьуьрмет авуниз эвер гана. Гьелбетда, авай кимивилерикайни, гьалтзавай четинвилерикайни рахана, иллаки куьчеда урус чIалал рахазвай аялрин гьалдикай, абурун гележегдикай.
Мярекатдал аялри лезгийрин бажарагълу шаиррин эсерар кIелна. Эхирдай абуруз директордин къул алай грамотаяр гана.
Гьажи Къазиев, муаллим
