Ватан хуьн гьар са ватандашдин пак буржи я. Чи жегьилри аскервилин и пак буржи намуслувилелди кьилизни акъудзава. Гьа гьисабдай яз Гьуьсейханов Раидинани. Курхуьрелай тир ада 2013-йисуз чкадин 2-нумрадин юкьван мектеб агалкьунралди акьалтIарна.
ЧIехи классра кIелдайла, ада амай предметрихъ галаз санал ОБЖ-дизни артух дикъет гуз хьана. Адан фикир алакьунар, кьатIунар авай офицер хьун тир. РикIевай мурадрив ам агакьна.
2014-йисуз ам Серпуховдин Петр Великийдин тIварунихъ галай военный институтдик экечIна. Къастунал кIеви жегьилди гьа сифте курсунилай хъсандиз кIелна. Гила а институтдикай военный академия хьанва. 2019-йисуз дерин чирвилер аваз анаг куьтягьна.
Гужлу беден авай хъсан спортсмен, жегьил офицер Раидиналай хуьруьн маса жегьилрини чешне къачуна. ИкI, исятда академийра санлай 12, военный училищейра 6 касди кIелзава. Идан гьакъиндай, диде-бубайриз, райвоенкоматдиз хквезвай чарарини шагьидвалзава.
Раидинахъ галаз академия адан халудин хва Вагъифани акьалтIарна. Адан стха Рустам ана 5-курсунин курсант я.
Жегьил офицер, лейтенант Раидин Гьуьсейханова Иркутскдин областда взводдин командир яз къуллугъзава. Ина адаз гьукуматди кIвални ганва. Военный многоборьедай спортдин мастервиле кандидат тир ада вичин взводда авай аскерриз спорт кIанарзава. Адан взвод частуна чешнелубурукай сад хьанва. Нетижа яз, Раидин Гьуьсейханов мукьвара отпускдиз хуьруьз хтана. Хизанри, мукьвабуру, мектебдин аялрини ам шаддиз къаршиламишна.
Къейд ийин хьи, вичин чирвилер мадни деринарун патал ам Иркутскдин университетдин юридический факультетдик экечIнава. Аквазвайвал, жегьил офицер Раидин Гьуьсейхановахъ хъсан мурадар ава. Къуй абур кьилиз акъатрай, мадни агалкьунар хьурай.
Райсудин Набиев,
муаллим, зегьметдин ветеран
