Къурбанов Виледин Медетханович 1941-йисуз Ахцегьа зегьметкеш хизанда дидедиз хьана. 2-нумрадин школада кIелна, Советрин Армиядин жергейра къуллугъна, шофёрвилин курсар куьтягьна. Кьисметди ам Киев шегьердиз акъудна.
Виледина 1966-йисалай Киевдин автобусрин 09124-нумрадин паркда “ЛАЗ-697 Р” маркадин “Интурист” автобусдин шофёрвиле кIвалахна. Алай вахтунда лайихлу пенсияда ава. Ада а машин дуьз 40 йисуз, капитальный ремонт ва я къайдаяр хуьдай органрин, гьакI чкадин жемятдин патай са туьнбуьгьни авачиз, 4 миллион километрдин мензилдиз гьална (и кардин гьакъиндай махсус шагьадатнама ава). 1985-йисуз “Коммунистический зегьметдин зарбачи” лишан, кIвалахзавай карханадин ва шегьердин руководстводин патай гьуьрметдин грамотаярни кьиметлу пишкешар къазанмишнавай вини дережадин пешекардиз шегьерэгьлийрин арада кьетIен гьуьрмет ава.
Машинди лагьайтIа, исятдани, сятди хьиз, кIвалахзава, ара-бир шегьердин къене туристарни тухузва. Гележегдин несилриз къайгъударвилин чешне яз, эхиримжи 5 йисуз ам Киев шегьердин 3-нумрадин автобусрин паркдин музейда надир экспонат хьиз хуьзва ва муьрхъуь такьун патал гагь-гагь шегьердиз акъудзава. “Чешнелу шофёрдин тIвар Гиннессан рекордрин ктабда туниз лайихлу я”, — лугьузва ам чидайбуру.
Дашдемир Шерифалиев
