СтIал Сулейманан райондин кьил Нариман Абдулмуталибова мукьвара А.Саидован тIварунихъ галай Эминхуьруьн юкьван школада физкультурадин тарсар гузвай муаллим Шагьломаз Мурадагъаеваз яргъал йисарин намуслу зегьметдай Чухсагъулдин чар гана, тебрикдин келимаяр лагьана.
— Гьакъикъатдани, Шагьломаз Жамалович районда физический культурадин лап хъсан муаллимрикай сад я, — лагьана чаз райондин образованидин управленидин начальник Гьуьсейн Шихбабаева. — Ада гьазурзавай школьникрин командайрихъ ва кьилдин спортсменрихъ районда спортдин жуьреба-жуьре хилерай тухузвай турнирра агалкьунар жезва.
Ш.Мурадагъаев 1964-йисуз Туьркменистан ССР-дин Небит-Дагъдин райондин Хъутур-Тепе поселокда хипитIарвияр тир Жамал ва Аният Мурадагъаеврин хизанда дидедиз хьана. 1-3-классар ада Аламишедин (Эминхуьруьн) школада кIелна. 4-классдилай эгечIна Шагьломаза кIелун Небит-Дагъ шегьердин 17-нумрадин юкьван школада давамарна. Хъсан къиметар аваз кIелунихъ галаз санал, ам азаддиз кьуршахар кьунални машгъул хьана. Школьникрин арада ада шегьердин, райондин, республикадин гзаф турнирра кIвенкIвечи чкаяр кьуна. Кьилди къачуртIа, адакай Небит-Дагъдин райондин ва Туьркменистандин чемпион (жаванрин арада) хьана. Советрин Союздин спортдин мастервиле кандидат тир Ш.Мурадагъаева 1981-йисуз юкьван мектеб акьалтIарна, ам Москва шегьерда эцигунрин училищедик экечIна. Гуьгъуьнлай ГЦОЛИФК-дин тренервилин факультетни акьалтIарна. Училищеда ва институтда кIелзавай йисарани Шагьломаза Москвадин чемпионатра, Вирисоюздин са шумуд турнирда гъалибвал къачуна, приздин чкаяр кьуна.
Институт лап хъсан къиметар аваз акьалтIарай Ш.Мурадагъаев 1986-йисуз Небит-Дагъ шегьердин ДЮСШ-да азаддаказ кьуршахар кьунай тренервиле кIвалахал кьабулна. Кьегьал лезги хцин — хъсан тренердин гъилик вердишвилер къачур жаван спортсменрини хейлин турнирра чпин алакьунар къалурна, кIвенкIвечи чкаяр кьуна. Са шумуд сеферда Шагьломаз Жамалович “Небит-Дагъ шегьердин лап хъсан тренер” тIварцIиз, Туьркменистан ССР-дин физический культурадин ва спортдин министерстводин гьуьрметдин грамотайриз лайихлу хьана.
1990-йисалай Ш. Мурадагъаева тренервилин кIвалах Эминхуьруьн аялринни жаванрин спортдин школада давамарна. Адан гъилик вердишвилер къачур са шумуд касдикай спортдин мастерар, мастервиле кандидатар, Дагъустандин кIвенкIвечивал патал тухвай акъажунрин гъалибчияр хьана. Шагьломаз Жамаловичан гъилик Эминхуьре вердишвилер къачур, устадвал хкажай са шумуд касдикай гуьгъуьнлай, Россиядин маса субъектриз фена, неинки азаддаказ кьуршахар кьунай, гьакIни самбодай, кудодай, дзюдодай, грэпплингдай ва спортдин маса жуьрейрай машгьур спортсменар, чемпионар хьанва.
1993-йисан 1-ноябрдилай инихъ Шагьломаз Мурадагъаева, чна винидихъ лагьайвал, А. Саидован тIварунихъ галай Эминхуьруьн юкьван мектебда физкультурадин тарсар гузва. И везифаяр намуслудаказ кьилиз акъудунихъ галаз сад хьиз, тежрибалу муаллимди-тренерди мектебда футболдин, мини-футболдин командаяр тешкилнава, абурухъни районда, Кьиблепатан Дагъустанда тухузвай турнирра хъсан нетижаяр жезва.
Шагьломаз Мурадагъаева 2018-2019-йисара “Краснодарский многопрофильный институт дополнительного образования” ДПО-дин НОЧУ-да ва 2020-йисуз “ИНФОУРОК” ООО-да чирвилерин дережани хкаж хъувуна.
— Шагьломаз Жамалович кар алакьдай муаллим, тренер хьиз, хъсан общественникни я, — лугьузва мектебдин директор Рагьман Османова. — Ада ина баркаллу гзаф крарик кьил кутазва. Адан кIвалахдилай чун, кIелзавайбур диде-бубаяр гзаф рази я.
Чи мурад чешнелу муаллим Шагьломаз Жамаловичахъ кIвалахда мадни еке агалкьунар хьун я.
Хазран Кьасумов
