“Лезги газетдиз” Дагъустандин Кьилин пресс-къуллугъди хабар гайивал, 19-августдиз Сергей Меликов Мегьарамдхуьруьн райондиз мугьман хьана. Ина ам Азербайжандихъ галаз авай часпардилай элячIун патал кардик квай “ЦIийи Филер”, “Тагьирхуьруьн-Къазмаяр”, “Ярагъ-Къазмаяр” пунктариз фена, анра авай шартIарихъ, кIвалахдихъ галаз таниш хьана. Гуьгъуьнлай республикадин Кьили къанун-къайда хуьдай органрин регьберрихъ галаз совещание кьиле тухвана. Мярекатдин сергьятра аваз Урусатдин Дагъустанда авай государстводин часпардилай элячIун патал кардик кутунвай пунктарин кIвалах менфятлу авуниз талукь месэлаяр веревирдна.
Сергей Меликова къейд авурвал, къецепатан сиясатдин рекьяй гьалар са акьван къулайбур тушир девирда таможнядин кIвалахди экономика вилик финиз, уьлкведин милли итижар, кьетIен дережа хуьниз таъсирзава. Идалайни гъейри, сергьятрин ва таможнядин органри государстводин часпар саламатдиз хуьнихъ галаз санал кьиблепата Урусатдин экономикадин итижарни хуьзва.
Вичин рахунра Сергей Меликова, рекъемрал асаслу яз, гьар юкъуз пунктара часпардилай элячIзавай улакьрин кьадар гзаф жезвайдакайни лагьана. “Я геж, я фад тIугъвалдихъ галаз алакъалу яз кьабулнавай серенжемар къуватдай аватда. Гьавиляй чна пунктарин кIвалах гьи къайдада вилик тухудатIа, гиламаз веревирдна кIан-зава. Алай аямдин шартIара кIвалах менфятлуди хьун патал цIийи къайдайрал элячIунихъ еке метлеб ава. Гьа са вахтунда инфраструктурани вилик тухун (мугьманханаяр, улакьар акъвазардай махсус чкаяр ва мсб.), пунктариз мукьва мулкар авадан авун герек я. И месэлайрал инвестицияр желб ийизни жеда”, — алава хъувуна республикадин Кьили.
Ихьтин цIийивилер арадал гъунилай, С.Меликова гьисабзавайвал, неинки са республикадин, гьакIни вири уьлкведин кесер (имидж) аслу я, къецепатан уьлквейрихъ галаз алишверишдин рекьяй авай амадагвилин алакъаяр мягькем жеда, “Север-Юг” тIвар ганвай дегьлиз, туризм, экономика вилик фида, кIвалахдай цIийи чкаяр арадал къведа.
Совещанидин сергьятра аваз Сергей Меликова кар алай мад са месэла къарагъарна. Ам сергьятдиз мукьва мулкарай акатай къайдада чилер чара авунихъ ва пунктариз мукьва санитариядин жигьетдай кьиле тухузвай кIвалах къайдадик тахьунихъ галаз алакъалу тир. И жигьетдай ада са шумуд мисал гъана. Кьилди къачуртIа, “Ярагъ-Къазмаяр” пунктуна рекьерин ва логистикадин инфраструктура, улакьар акъвазардай пен саки авач. Пунктариз мукьва авай мулкарин сагьибар вужар ятIа тайин туш. “И ва маса месэлаяр гьялун патал таможнядин ва сергьятар хуьдай органрин къуватрихъ галаз санал республикадин муниципалитетрин, Дагъустанда кардик квай федеральный органрин управленийрин мумкинвилерикайни менфят къачуна кIанда”, — къейдна С.Меликова.
Совещанидал гьакIни “Ярагъ-Къазмаяр” пунктуна мукьвал-мукьвал жезвай чIехи нубатар арадай акъудуниз, адан къуватар артухаруниз талукь месэладизни килигна.
Мярекатда Дагъустандин таможнядин начальник Сергей Ироцкоди, РФ-дин ФСБ-дин РД-да авай Сергьятдин управленидин кьил Дмитрий Базанкина, РФ-дин “Росгранстрой” ФКГУ-дин Кеферпатан Кавказда авай филиалдин директор Мамати Гьамзатова ва масабуру иштиракна.
Агьмед Магьмудов
