ЦIийи йисан вилик Ахцегьа, Ленинан тIварунихъ галай куьчеда, «Ахты» тIвар алай цIийи спорткомплексдин патав, «Бубад булах» тIвар гана, булах ачухна. Булах лагьайла, парабуру фикирдайвал, им цин адетдин чешме туш. Тамашуниз лайихлу, гуьзел, тамам са имарат я. Ахцегьвийриз савкьат ва вичин диде-бубадин игьсан яз, ам гьалал зегьметдин харжидалди эцигайди Къазахстандин Атырау шегьерда яшамиш жезвай баркаллу ахцегьви, Къазахстан Республикадин лайихлу энергетик Мирзоев Магьмуд Амруллагьович я.
Булах ачухуниз талукьарнавай шад мярекатда райондин регьбер Абдул-Керим Палчаев кьиле аваз райадминистрациядин, общественный тешкилатрин векилри, Мирзоеван мукьва-кьилийрини ярар-дустари, мугьманри иштиракна.
— МискIин, ким, булах авачир хуьр хуьр туш. Къадим Ахцегьар и яржаралди девлетлу я, саки гьар са магьледа абур ава. Амма гьам тIварцIелди, гьам вичин акунралди гьайбатлу ихьтин гуьзел булах мад санани авач жеди… — ихьтин келимайрилай кьулухъ и цIарарин авторди булах ачухун патал гаф «Ахцегь район» муниципалитетдин кьил Абдул-Керим Палчаеваз гана.
— Гьуьрметлу юлдашар, тIебиатдин аламат тир булах хуьруьн генгвилин, мублагьвилин лишан я. Килиг, фикир це садра «Бубад булахдал» гьикьван дуьз гафар атIанватIа: «Булах аманат я, ам хуьх!»; «Яд — чилин иви, сагъарда вири. Яд — еке девлет — хух, къачу лезет!».
Магьмуд стхади, Къазахстандай хтана, вичин бубад кIвалин вилик жемятдиз булах эцигуналди, еке суваб къачунва. Идакди ада неинки диде-бубадиз рагьмет къазанмишнава, гьакI бубадин тIвар эбеди авунва, вичиз хайи гъвечIи ватандин ва ватанэгьлийрин гьал, кьисмет къайгъусуз туширди къалурзава. Пара кьадар сагърай! И жумарт, жуьрэтлу кардалди ада патара яшамиш жезвай ва чпиз гьахьтин мумкинвал авай ватанэгьлийризни хайи ватан абад авунин чешне къалурзава.
Квез чида хьи, чи мурад-къаст Ахцегьар гуьзел шегьердиз элкъуьрун, адал виликан машгьурвал хкун, патара авай чи кьегьал рухвайри хайи ватандихъ чин элкъуьрдайвал авун я. И жигьетдай, бюджетдинбурулай алава, спонсорвилин такьатар желб авуналди, чна пара крар ийизва: Ахцегьа Гуьне патан тарихдин дар куьчеяр, тIебии къван туна, чир техжедайвал аваданламишнава; Рутулрин Лалан дередай хъвадай михьи яд гъизва (и булахдани гьа яд жеда); машгьур гьамамар ва урус къеле туькIуьр хъийизва; рекьер, муькъвер, цин къаналар бинедилай ремонтзава; Ахцегьа, вилик надир гьавиз ва фонтанни кваз, зурба мугьманхана хкажзава ва икI мад. Лугьун хьи, Ленинан тIварунихъ галай гьа и шегьре рекьени 2025-йисуз, гегьеншар хъувуна, цин турбаяр дегишарна, цIийи кьилелай къир цада. Фикирдик гьакI чкадал зегьметдин чкаяр тешкилун патал гъвечIи карханаяр, турбизнес арадал гъун ва пара маса крар ква. Иншаллагь, жемятдин ва патара авай Магьмуд стха хьтин ватанпересрин куьмекдалди 4-5 йисан къене Ахцегьар дагъдин халисан шегьердиз — туристрин макандиз элкъуьрда, — къейдна А.-К. Палчаева.
Ада гьакIни булахдал зегьмет чIугур журналист, райондин «ЦIийи дуьнья» газетдин редактор и цIарарин автордиз, «Ахты» спорткомплексдин директор Сердер Малалиеваз, Ахцегьа изобразительный искусствойрин школадин директор Мегьамед-Зериф Гьажиеваз ва амай стхайриз сагърай лагьана.
Булах арадал гъунин фикирдикай лугьун патал мярекатдал Магьмуд Мирзоеваз гаф гана.
— Гатуз рухсатдиз хтана, Ахцегьа хъсанвилихъ жезвай цIийивилер акурла, рикIиз пара хвеши хьана. Мумкинвилиз килигна, за жувалай алакьдай пай кутун кьетIна. Сифте нубатда, зи тереф хвена, бубадин кIвалин виликай чил къалурай райондин кьил Абдул-Керим Нажмудинович ва ахпа амай вири юлдашар пара кьадар сагърай! Алакьдай куьмек хайи Ватандиз за гележегдани ийида, — лагьана ада.
Мярекатдал ЦIийи йис мубарак авунин, булах эцигун тебрик авунин хуш келимаяр РД-дин Кьилин Контрольный управленидин начальникдин заместитель, экономикадин илимрин кандидат Гьажигьуьсейн Гьажиева, зегьметдин ветеран Керем Керемова, Къарачаево-Черкесия Республикадин лайихлу художник Мегьамед-Зериф Гьажиева, «Ахты» спорткомплексдин директор Сердер Малалиева, булахдин спонсордин чIехи стха Къадим, хтул Анвар Мирзоеври ва маса ксарини лагьана. Абуру чкадин вацIун кьерен надир къванер ишлемишуналди, ацукьдай куьсруь, къванцин столни галаз ва хъсан къав алаз туькIуьрнавай кьетIен жуьредин гуьзел имарат, дугъриданни, булахдин кимин тамам ансамбль хьанвайди къейдна, шегьре рекьин къерехдив гвай и булах насигьатдин кимиз ва рехъди физвай ксаривай ацукьна ял ягъиз жедай вижевай чкадиз элкъведайдахъ инанмишвал къалурна. Ам арадал гъайи Магьмуд Мирзоеваз ва зегьмет чIугур вири ксариз сагърай лагьана.
Эхь, Ахцегьар дагъдин аваданлу шегьердиз элкъуьрун ва санлай райондал виликан машгьурвал хкун патал ватанпересвилин, мергьяматлувилин манадин и серенжемдиз шерик хьуниз чна чпиз мумкинвал ва жумарт рикI авай вири стхайриз эверзава. Умудлу я, умуми къуватралди чавай Ахцегьар ва санлай район махарик квай хьтин гуьзел чкадиз элкъуьриз жеда.
Дашдемир Шерифалиев
