Ватандин ЧIехи дяведа хпежви Мамедов Хебиди еке кьегьалвилер къалурна. Буденыйдин регьбервилик квай атлуйрин частариз акъатай ада кIеве гьатай са чкадални зайифвалнач. Ам разведкадизни фена, ада яру ва пеле къаш авай балкIандаллаз гзаф сеферра душмандин винел гьужумарни авуна, хурук акатай кьван фрицарни къирмишна, гьалтай кьван вацIарай уьтквемвилелди экъечIни авуна. Кьве сеферда хирер хьанатIани,адаз агъзурралди советрин аскеррихъ, офицеррихъ галаз инсафсуз фашистрин зулумдикай хайи чил, хуьрер, шегьерар, Украина, Белоруссия, Венгрия, Польша азаддай бахт акуна.
Гъалибвал Х.Мамедова Германиядин чилел, лазаретда, къаршиламишна. Ахпа ам хирер сагъар хъийиз госпиталра амукьна, хуьруьзни геж хтана. Хурудал Яру Гъед, Яру Пайдахдин орденар, «Жуьрэтлувиляй», “Берлиндал гъалибвал къачунай” ва маса медалар алаз.
Зи рикIелай садрани алатдач, школадиз атана, чахъ галаз гуьруьшмиш хьайи вахтунда, ада Будапешт шегьердиз чеб гьахьайвал, ам азад авурвал ахъайнай. Чи аскеррин, атлуйрин кьегьалвилер тешпигь авачирбур тир.
Хирер сагъ хъхьайла, ам вичихъ гелкъвей ва пара хъсанвилер авур медсестра Катядин патав гумукьнай. Хуьруьз хтайлани, абурун алакъа атIаначир. Катяди адаз гьамиша а вахтара чинра авачир хьтин атирлу тенбек ва пIапIрусдин кьелечI чарар рахкурдай. Хебидин пIапIрусрикай дад такур итим, жегьил хуьряй жагъида лагьайтIа, тапарар тир.
1966-йисуз хуьруьнвийрихъ галаз дяведин ветеранни Белиждин поселокдиз куьч хьанай. Ада зегьметдани вичин гьунарар къалурнай.
Хийир Эмиров
