“Сeмафордин” — 10 йис
Зи суьгьбетдин игитар чпин пешеди ва кIвалах авур чкайри сад ийизва. Бубади башламишай рехъ адан хци къенин йикъан цIийи шартIара давамарзава.
Алибег Гьажиагъаевич Алибегов 1936-йисан июндиз Ахцегь райондин Ялахърин хуьре дидедиз хьана. Ялахъвияр асирра хъсан малдарар, хипехъанар, чIижерхъанар хьиз машгьур я. И хуьруь гьакI тIвар-ван авай художникарни, къванцин устIарарни, музыкантарни, манидарарни гана. Чна суьгьбетзавай дагъвиди вичиз маса пеше хкяна — ракьун рекьин фялевал.
1953-йисуз, вагонриз килигзавай пешекар яз, ам Дербентдин ВЧД-да кIвалахдив эгечIна. Ракьун рекьин станциядал атай поездрин вагонрин технический гьал ахтармишиз. И везифа ада саки 40 йисуз кьилиз акъудна. Зегьметда агалкьунрай хейлин пишкешар, шабагьар гана. Ам “Зегьметдин ветеран” тIварцIин сагьиб я.
Вичиз руьгьдин маса алакьунарни ганвай кас яз, ракьун рекьерин фяле Алибег Гьажиагъаевич азад вахтунда (60-80-йисар) ракьун рекьин станциядал шикилар ягъунални машгъул хьана. “Москва-5” маркадин фотоаппарат гваз ам мукьвал-мукьвал зегьметчи коллективра аквадай. Лап хъсан пешекаррин, зегьметдин зарбачийрин шикилар ягъиз, жуьреба-жуьре газетриз рекье твазвай. ИкI адакай Дербент шегьердин “Коммунизмдин пайдах” (гила “Дербентдин цIийивилер”) “Дагъустандин правда”, “Коммунист” (гила “Лезги газет”), “Гудок” ва “Звезда” газетрин фотожурналист хьана. Адан шикилар, а вахтара адет тирвал, газетрин сад лагьай чинриз акъудзавай. И карди адан машгьурвални артухарна.
Алибег Гьажиагъаевич Алибегов 2013-йисуз рагьметдиз фена. Амма адан рехъ, иллаки журналиствилин везифа, гила хва Адиширин Алибегова давамарзава.
И кардихъ, чи фикирдалди, ихьтин себебар ава. Сад лагьайди, бубадини хци кьведани ракьун рекьел кIвалахна. Адиширина, вичин бубади хьиз, Дербент станциядин локомотиврин депода операторвиле кIвалахзава. Кьвед лагьай себеб, Адиширина, вичин буба Алибега хьиз, Дербент шегьердин образованидин управленида жегьил техникрин станцияда “Кар алакьдай гъилер” кружок кьиле тухузва. Алай вахтунда а тешкилатдиз “Техническое моделирование” лугьузва.
Пуд лагьай себеб, бубади хциз фотоаппарат гваз шикилар ягъизни чирна, яни бубади хва журналиствилин рекьени туна. Кьуд лагьай себеб ам я хьи, Адиширина, бубади хьиз, вичин макъалаяр ва шикилар винидихъ чна тIварар кьунвай газетриз рекье твазва. Хейлин затIар “Учитель Дагестана” газетдиз ва “Школани производство” журналдизни акъатна.
Ялахъви Адиширин яратмишунрин рекьяй вичин бубадилайни виликди фена. Макъалаяр кхьинихъ галаз сад хьиз, ада шиирарни кхьизва. Алай вахтунда ам РФ-дин журналистрин Союздин член, ракьун рекьин работникрин “Семафор” (виликдай “Сапсан”) газетдин литературадин отделдин редактор я. Гьа са вахтунда Дербентдин станциядал ачухнавай “Железнодорожник” музейдин кIвалахдани активнидаказ иштиракзава. Хейлин йисара адакай чкадин сечкийрин участковый комиссиядин членни хьана. Дербент шегьерда кьиле физвай литературадинни прессадин ва маса мярекатра активвилелди иштиракзава.
Ялахъви Адиширина икьван чIавалди вичин шииррин кьве кIватIал чапдай акъуднава, абурукай сад хайи хуьруьз — Ялахъиз бахшнава. Ана хуьруьн тарихдихъ галаз санал Дербентда ва и районда яшамиш жезвай вири ялахъвийрин адресар, телефонар ганва.
2020-йисуз чапдай акъуднавай “Фикирар” кIватIал тамамвилелди лирикадин шииррикай, камаллу келимайрикай ибарат я.
Вичин намуслу зегьметдай А.А.Алибегов Россиядин ракьун рекьерин профсоюздин Гьуьрметдин грамотадиз, РФ-дин госстатистикадин къуллугъдин медалдиз ва маса шабагьриз лайихлу хьанва.
Гъилевай йис “Семафор” газетдин 10 йисан юбилейдинди я. Ам газетдин редакциядин журналистри ва Дербент станциядин ракьун рекьин работникрин профсоюзди чпин такьатрихъ тешкилнава,4 чиникай ибарат яз, вацра са сеферда чапдай акъудзава ва кIелзавайбурув агакьарзава. И зегьметдик Адиширин Ялахъвидин еке пай ква. Газетдин патарив ада чкадал алай яратмишдай интеллигенциядин векилрин еке десте кIватIнава. Абурук Дагъустандин халкьдин шаир Кичибег Мусаев, тIвар-ван авай писатель ва юрист, лезги писателрин Союздин председатель Абил Межидов, Дербентдин литераторрин еке дестедин кьиле авай Тагьир Салегь ва масабур ква.
Юбилейдихъ галаз алакъалу яз, и коллективдиз (кьилин редактор Гьажиагъа Мегьамедшерифов) СКЖД-дин профсоюздин руководстводи чухсагъулдин чар ва пулдин премияр рекье тунвай. Юбилей мубарак авуналди, чаз газетдихъ, адан авторрихъни, кIелзавайбурухъни агалкьунар хьана кIанзава.
Тахмираз Имамов,
РФ-дин писателрин Союздин член
