Адетдин женжел гада яз, юзун-чукурунал, футболдал гзаф рикI алаз чIехи хьайи Ибрамхалила вич неинки спортда, гьакI чирвилер къачунин рекьени гьевес ва хъсан гележег авай ученик тирди мектебда амаз къалурна. Жегьил вахтунда ада футболдин акъажунра хейлин медалар-шабагьар къазанмишна.

Зи ихтилат алай вахтунда ДГУ-дин медениятдин факультетда муаллим яз кIвалахзавай къала­жухви Ибрамхалил Сабирович­ Мусаевакай я. Ам 1962-йисан 20-сентябрдиз Докъузпара район­дин Къалажух хуьре къуллугъчи­дин хизанда дидедиз хьана­. 1980-йисуз ада Махачкъаладин­ 33-нум­радин мектеб куьтягьна­. 1981-йисуз Новочеркасскдин инже­нервилинни ме­лио­рациядин институт­­дик экечI­на ва 1986-йисуз­ анаг агалкьунрал­ди­ куьтягьна­, инженер-гид­ро­тех­никдин­­ дип­лом къачуна. Гуьгъуьнлай, 1986-1988-йисара, Ар­мия­дин жергейра ватандиз къуллугъ авунин везифа кьилиз акъудна. 1988-йиса­лай пешедин рекьяй инженер-про­ектировщиквиле зегьметдин рехъ башламишна. Тежрибада, юнда фад гьатдай алакьунар авай пешекар яз къалурайвиляй, кьве йисалай виниз вахт арадай фейила, ам проектринни конструкторвилин технологиядин институтда (ПКТИ) чIехи инженер-эцигунардайдан къуллугъдал тайинарна.

1993-йисуз Ибрамхалил Мусаева эцигунрин хиляй бизнесдал машгъул жедай «Гелиос» хсуси кархана арадал гъана ва анин директорвиле кIвалахна.

2003-йисуз ам Дагъустандин кьилин вуз тир ДГУ-да компьютерщиквилин, интернетдин сетдин администраторвилин къуллугъдал­ элячI­на. ЦIийи чкадани адаз къуллугъдин жигьетдай вилик фин патал 2 йисан тежриба бес хьана: 2005-йисуз адакай и вуздин медениятдин факультетда информатикадин, информациядин ва мультимедиадин технологийрин тарсар гудай чIехи преподаватель хьана. «Информатика» ва «Театр­да мультимедиадин технологияр» дисциплинайрай ада са жерге программаяр ва презентацияр туькIуьрна. Медениятдин факультетдин актервилин отделенида ада къенин йикъалди информатикадайни мультимедиадин тех­нологийрай студентриз тарсар гун давамарзава. ДГУ-да муаллимвилин кIвалахдив эгечIунихъ галаз сад хьиз, вичин чирвилер мадни артухар, мягькемар хъувун патал И.Мусаев экологиядин факультетдай магистратурадикни­ экечIна ва кьве йисалай агалкьунралди куьтягьна, экологиядин ва тIебиат иш­лемишунин рекьяй пе­шекарвал­ къачуна.

2009-йисуз «муаллим-пси­хо­лог» пешедай ада вузрин муаллимрин пешекарвал хкажунин рекьяй ДГУ-дин махсус факультетдин курсара кIелна ва лап хъсан къиметар авай шагьадатнама къачуна.

2019-йисалай ада Махачкъалада кардик квай «Колледж ГО и ЧС» ПОУ-дани (колледж гражданской обороны и чрезвычайным ситуациям) информатикадин тарсар гузва.

Аямдин дегишвилерин, цIийи­вилерин кьулухъ галамукь тавун патал муаллимди датIана пешекарвилин дережа хкажун эвелимжи везифайрикай яз гьисабзава. Кьве йис идалай вилик ада «Юкьван ва пешекарвилин образованидин тешкилатра информатика ва информациядинни коммуникациядин технологияр гунин теория ва методика» пешедай диплом къачуна.

Къейд ийин, 2016-йисуз­ Иб­рамхалил Мусаева ата-бубай­ри­лай эгечIна сихилдикай, мукьва-кьилийрикай малуматар авай «Ро­до­словный очаг» тIвар алай ктаб чапдай акъудна. Ихьтин гьар са ктаб давам жезвай сихилдин цIийи-цIийи несилар патал вижевай аманат я. Буба Сабир Мусаеван экуь къаматдиз бахшнавай и ктабдин метлеб ам къадим тарих авай хуьруьз, анин агьалийриз талукь хьуни мадни артухарзава.

Ктабдин эвел кьиле РФ-дин лайихлу эцигунардайди тир Жавидин Рустамова Ибрамхалил Мусаевакай ихьтин гафар кхьенва: «Заз Ибрамхалил адалатлу ва лайихлу инсан яз чиз гзаф йисар я, адан агалкьунрал за гьамиша шадвалзава ва адаз алакьдай куьмекарни гуз гьазур я. Яргъалди ва дурумлудаказ зегьмет чIугуналди, ада вичин рикIе фадлай авай ният кьилиз акъудна».

Дагъустан АССР-дин лайихлу мелиораторвилин тIвар гайи, «Гьуьрметдин лишан» ордендин­ сагьиб хьайи, республикадин меркезда жавабдар къуллугъар кьилиз акъудай адан буба Сабир Асанагъаевич вичин девирда лап хъсан мелиоратор ва гидротехник яз машгьур тир. Алатай йисуз Къалажухрин хуьруьн куьчейрикай сад адан тIварцIихъ яна ва цлал мемориалдин кьул алкIурна.

Вичин патай герек турбаяр ага­кьарна, Сабир Мусаева Къалажух хуьре булахни туькIуьрнай. Ихьтин ва маса сувабдин, регьимдин крарикай тIвар кьунвай ктабда гегьеншдиз кхьенва. Гьадан насигьатар уьмуьрдин тарсар яз кьуналди, Ибрамхалил Мусаева алай вахтунда акьалтзавай несилриз чирвилер ва тербия гуник вичин пай кутазва. Къуй адахъ регьят тушир кIвалахда агалкьунар хьурай.

Куругъли Ферзалиев