Дарманрин набататар

Вичин дувул хийирлу за­тIаралди (аскорбиндин, глицирризиндин кислотаяр, аспарагин) девлетлу набататрикай сад биян (солодка) я. Адак хи­миядин жуьреба-жуьре элементарни (алюминий, селен, калий, кальций, цур, ракь, магний ва мсб.) ква. На­бататдин тандик эфирдин чIемер, сапонинар ва полисахаридар ква. Адак квай дармандин такьатар инсаниятдиз дегь заманайрилай инихъ малум я.  

Бияндин тан яцIуди, мягькемди я. Адан кьакьанвал зур метрдилай метрдал кьван хкаж хьун мумкин я. Амма дувул лагьайтIа, саки 8 метр кьван чилин де­риндиз физва. Цуьквер фичIивал квай хьтинбур же­да. И набататдин кьве жуьре ава.

Дарман патал адан дувулар гатфарин сифте вацра ва зулун эхирра кIватIун теклифзава. Чиликай хкудна, чуьхвена, чкал алудна, 30-35 сантиметр алай кьа­тIар атIана, абур ракъинал кьурурда. Кьуранвай биянрин дувулар хъипивал квайбур жеда. ИкI гьазурай дувулар 10 йисуз кьван хуьз жеда.

Адак хуквадинни ратарин, бронхит азарриз аксивалдай такьатар ква. Кьуру уьгьуьяр алудунин кардани бияндикай менфят къачузва. Хамунин азарар (агъургъан, псориаз, экзема, пузырчатка ва мсб.)  сагъарун патални и набатат ишлемишиз жеда.

Бияндикай ва адан дувулрикай алай аямдин медицинада хейлин дарманар гьазурзава. Шекердин азар авайбурувайни бияндин дувулрикай гьазурнавай гьалимадикай менфят къачуз жеда. Амма инал тIварар кьунвай азарар квай инсанри биянар гьи жуьреда ишлемишун лазим ятIа чирун патал пешекардин меслятар чарасуз я, вучиз лагьайтIа адакай инсандиз зиян хкатдай дуьшуьшарни ава.

«Лезги газет»