Са тIимил йикъар идалай вилик Сулейман-Стальский райондин центральный больницада “Заз уьмуьр багъиш ая” лишандик кваз мярекат кьиле тухвана. Ам тешкилайди ЦРБ-дин аялар хадай отделенидин акушер-гинеколог Манфиза Бубаевна Дадашева я.
— “Заз уьмуьр багъиш ая” серенжемдин асул метлеб дишегьлийри аялар чIурунин вилик пад кьуникай ибарат я, — лугьузва Манфиза Дадашевади. — Аял чIурун тахсиркарвал я. Дишегьлидин сагъламвилизни и карди еке зарар гузва. Гьа и кардин патахъай чна дишегьлийрин арада гъавурда тунин кIвалах тухузва, меслятар къалурзава. Ихьтин мярекатри вичин хъсан нетижани гузва. Эхиримжи йисара, мисал яз, чи районда аялар чIурзавай дуьшуьшар хейлин тIимил хьанва.
М.Дадашевади мярекат тухузвай гьал, ада дишегьлийриз гузвай меслятар акурла, за жува-жувак фикирна: и духтур, гьакъикъатдани, бицIекринни дидейрин къайгъуда авай кас я.
Манфиза Бубаевнадин рикI гьеле школада кIелзавай йисарилай духтурвилин пешедал алай. Гьавиляй ам, юкьван школа акьалтIарна, Дагъустандин медицинадин академиядик экечIна, 2014-йисуз анаг хъсан чирвилер аваз акьалтIарна. Гуьгъуьнлай ада акушер-гинеколог пешедай ординатурадани чирвилер артухарна.
М.Дадашевадин суьгьбетдай малум хьайивал, райондин аялар хадай яшара авай дишегьлияр духтуррин, гьа гьисабдай яз акушер-гинекологрин кьетIен гуьзчивилик ква. Ада гьар юкъуз вичин кабинетда 12-15 дишегьли кьабулзава, абурун сагъламвал ахтармишзава, медицинадин рекьерай куьмекар гузва, меслятар къалурзава.
Манфиза Дадашевадиз кIвалахдин юлдашрин ва агьалийрин патай лайихлу гьуьрмет ава.
Хазран Кьасумов
