Къе чи жегьил несилдин арада яратмишунрин пай ганвай музыкантар, шаирар, художникар тIимил авач. Малум тирвал, гьар са касдихъ вичелай хъсандиз алакьдай, вичиз тIебиатдин патай пай ганвай тайин кар, сенят ава. Садбуру илимдин сирерай кьил акъудзава, муькуьбур искусстводал машгъул хьанва ва икI мад. Гележегдин пеше хкягъунин гьакъиндайни жегьилриз тIимил меслятар къалурзавач, амма тIебиатди пай ганвай хиляй чирвилер къачун, а кардал машгъул хьун, са шакни алачиз, важиблу я. Чпин рикIиз кIани кардал алахънавай пешекарар общество, ватан патал хийирлуни я. Мукьвара Мегьарамдхуьруьн райондин кьил Фарид Агьмедован ва райондин активный жегьилрин векил Нажмудин Шагьбанован арада и месэлайрикай суьгьбет кьиле фена.
Райондин искусстводин школада тербия къачунвай Нажмудиназ манидарвилин бажарагъ авайди агьалийри фадлай кьатIанва. Ам республикадин “Зи къул — зи Дагъустан” конкурсдин гъалибчи ва райондинни республикадин гзаф маса мярекатрин иштиракчи я.

Райондин кьили къейдайвал, искусствода, медениятдин хиле чпихъ бажарагъ авай ксар обществодиз герек я. Обществоди а касдихъ авай яратмишунрин бажарагъ винел акъудна, адаз фикир гана кIанда.
— Райондин регьберри гележегдани бажарагълубуруз культурадин, искусстводин, илимдин хилерай хъсан проектриз ва планриз гьамиша фикир гуда, абуруз куьмекда. Кьилинди общество виликди тухунин карда хийир гун я. Хъсан пешекарар, бажарагълу жегьилар къе район виликди тухун патал вири хилера герек я, — лагьана Ф.Агьмедова.