Советрин Союздин халкьари, къагьриман аскерри, Ватандал чапхунчийри, душманри вегьейла, ам кIеве гьатайла, зурба игитвилер къалурна. Жегьил чанарни къурбандна, хайи чил, муг хвена. Абуруз гьамиша баркалла къвезва.
Чи уьлкведин гьар са пипIе ватандин аслу туширвал, азадвал патал душманрихъ галаз женгер чIугур кьегьалар рикIел хуьзва, абуруз памятникар, обелискар эцигнава ва и кар гилани давамарзава. Дагъустандин хуьрерани виринра Ватандин ЧIехи дяведа телеф хьайибуруз ва иштиракайбуруз обелискар ава.
Дагъларин уьлкведин меркезда и йикъара тарихдин «Россия зи тарих» паркуна Ватандин ЧIехи дяведин ва дяведин махсус серенжемдин иштиракчийриз бахшнавай ва цIийи хъувунвай аскервилин баркалладин зал ачухна.
Къейд авун лазим я хьи, региондин Кьил Сергей Меликова музейдиз СВО-дин иштиракчийри вичел ихтибарнавай чарар, командиррилай атанвай чухсагъулдин кагъазар, артефактар, пишкешар вугана.
«Зун ихьтин къарардал вучиз атана лагьайтIа, республикадин кьегьалри женгинин тапшуругъар викIегьвилелди кьилиз акъудзава. Инал кьилди-кьилди гьар садан тIварар кьун тавуртIани, амма музейдин баркалладин и залда виридакай малуматар жеда, гьакI чи гадайрин игитвилерикай ва чи инсанри СВО-диз гузвай куьмекдикай ихтилатзавай документар, чарарни».
Инсанрин фикир частарин женгинин пайдахри, шикилри, махсус серенжемдикай ва чи кьегьалрикай кхьенвай ктабри чпел желбда. Сергей Меликова лагьайвал, кьилинди и шейэр ваъ, абурухъ галаз алакъалу чи лайихлу ва жуьрэтлу инсанар я, иллаки абур я и залдин рикI.
Музейда эцигнавай гьар са затIунихъ вичин ва вич алакъалу тир инсандин чна дамахдай тарих ава. Залдин майдан тирвал къалурзавай экспонатри Ватандин итижар патал чпин уьмуьр хаталувилик кутазвай гьар сад рикIел хуьзва, абуруз гьуьрметзава.
Баркалладин залда кьетIен чка тарциз ухшар барельефди кьазва. Ада, йисан вахтариз килигна, вичин шикил дегишарзава. Тарцин къаматди СВО-да телеф хьайи аскеррин диде-бубайри кьил кутур «РикIел хуьнин багъ» акциядин мана давамарзава. И акцияди вири Дагъустан сад авунва. Багъдихъ, тарцихъ еке мана ава. Абуру, са куьнизни килиг тавуна, уьмуьр давам жезвайдан, Ватан патал чанар къурбанд авур игитар гьамиша чи рикIера амукьдайдан гьакъиндай шагьидвалзава. ВикIегь рухвайрин игитвилер чна садрани рикIелай алуддач ва абур къвезвай несилрални агакьарда.
Абад Азадов
