Газетдин тарихдикай ктаб
Алатай йисан эхирра Бакуда 30 йисуз лезги халкьдин уьмуьрда чIехи роль къугъвай, хайи чIал хуьн ва вилик тухун патал датIана женг чIугур, чи тарихдикай, медениятдикай, сейли ксарикай, халкьдик къалабулух кутазвай месэлайрикай кхьей, халкьдин мефт, адан мез хьайи “Самур” газетдин юбилейдин мярекат кьиле фена.
И лишанлу вакъиадихъ галаз алакъалу яз, эхиримжи 25 йисуз газетдиз регьбервал гайи, са патахъайни куьмек авачиз, ам вичин хсуси такьатралди чапдай акъудай, вири дуьньядин лезгийрин рикI алай печатдин органдиз элкъуьрай шаир-журналист Седакъет Керимовадин кIелдайбуруз газетдин тарихдикай, фейи рекьикай, редакциядин четинвилерикайни агалкьунрикай чирвилер гузвай “Самур” 30” тIвар алай ктаб чапдай акъатнава.
Лезги ва азербайжан чIаларал акъуднавай ктабда гьа са вахтунда “Самурдин” дустарикай, адан таъсиб чIугвазвайбурукай, мухбиррикай, газетди къарагъарнавай месэлайрикай ихтилатнава.
Бакудин “Элм ва тегьсил” чапханади ранглудаказ, иер кIалубда аваз басма авунвай ктабдин редактор Муьзеффер Меликмамедов я.
ЦIийи шииррин кIватIал
И йикъара Бакудин “Red N Line” ММС чапханади лезгийрин тIвар-ван авай шаир, журналист Муьзеффер Меликмамедова эхиримжи йисара азербайжан чIалал кхьенвай шииррикайни поэмайрикай ибарат “Зи рикIин гафарин тIал” тIвар ганвай ктаб чапдай акъудна. Им автордин къелемдикай хкатнавай 28 лагьай ктаб я. И кIватIалда дуьньядин, ватандин, халкьдин дердийрикай веревирдер ийизвай философиядин шиирар, Къарабахдин дяведиз талукьарнавай поэмаяр гьатнава.
Шаирди кьилди вад темадикай веревирдер ийизва: дуьнья авай гьалар, тIебиат ва инсанар, лезги тIвар ва къилихар хуьн, инсанпересвал ва Къарабахдин дяве. Авторди лезгивал хиве кьан тийизвай ватанэгьлийрин рикIел чун мерд ва дуьзвал кIани, къадим халкьдин векилар тирди хкизва, абуруз и тIвар хуьниз эвер гузва. М.Меликмамедова “Лугьудай хьи, лезги тир”, “Зи гьар дерт са цIар я”, “Кьегьалвилин кьин кьадай”, “Лугьуда хьи” хьтин шиирар гьеле 2016-йисуз сифте яз “Самур” газетда чап хьайила, кIелдайбурун рикI алай чIалариз элкъвенай.
Ктабдиз сифте гаф кхьейди ва адан редактор тIвар-ван авай шаир, журналист Седакъет Керимова я.
Тарихдин цIийи гелер
Къуба райондин са жерге хуьрера тарихдин цIийи гелер винел акъатнава. Дигагь хуьруьн сурар авай чкада чилин кIвалахар кьиле тухудайла, са кьадар деринда вичин гьяркьуьвал 80 сантиметр тир къадим цал авайди чир хьанва. Цал вацIун къванерикайни канвай керпичрикай эцигнавай. Идалай гъейри, анай хъенчIин къапар ва регъуьн къванерни жагъанва.
Хуьруьн агьалийри лугьузвайвал, са шумуд йисар инлай вилик гьа чкадай къадим девиррин ракьун пулар ва жуьреба-жуьре хъенчIин къапарни жагъанай.
КъирицI хуьряйни къадим сурар ва чепедин кьетIен жуьредин къапар жагъанва. И затIар хуьруьн мектеб эцигзавай чкадал винел акъатнава. Археологри лугьузвайвал, къапар ва сурар ХI-ХII виш йисариз талукьбур я.
“Самур” газетдин сайтдай
