Са кьадар яшар хьанвай, уьмуьрдин уькIуь-цуру акунвай инсанрихъ, галаз таниш хьун, суьгьбет авун рикIиз хуш къведай кар я. Гьахълудаказ лугьудайвал, яшлу инсанар кIвалин, кимин абур я.

Са таниш касдин теклифдалди и йикъара зун Кьасумхуьрел (Алидхуьре) яшамиш жезвай партиядин ва зегьметдин ветеранар тир  Играмудин  ва  Бике  Жигероврихъ, абурун гьуьрметлу хизандихъ галаз таниш хьа­на. Чина берекатдин нур авай, сивел хъвер алай и яшлу инсанар акурла, абуру си­вяй акъудзавай сад-кьве келима ван хьайи­ла, заз акI хьана хьи, гуя чун фадлай таниш я. Зи рикIел чи бажарагълу шаир Майрудин Бабаханован шиирдин цIарар хтана:

Заз инсанар акуна

Ракъини хьиз нур гудай,

Ризкьи дардаз — фан тике,

Чка дардаз хур гудай.

На лугьуди, и гафар Майрудин Баба­ханова Играмудин ва Бике Жигероврикай кхьенва.

Ингье чун Играмудин Мегьамедалиевичахъ ва Бике Шамсудиновнадихъ галаз столдихъ ацукьнава. Атирлу чай хъваз-хъваз, за ветеранрин документра гъил экъуьрзава, абу­рун шабагьриз килигзава. Абурай заз ветеранрин уьмуьр, абуру чIугур зегьмет, лайихлувилер аквазва.

Чаз малум хьайивал, Играмудин Мегьамедалиевича алай йисан 5-мартдиз вичин 80 йисан юбилейни шад гьалара, къейдна.

Гьуьрметлу агъсакъал къе кефсуз я, яшари, яргъал вахтунда механизатор яз кIвала­хай йисари вичикай хабар гузва. Са бязи йисар, кIвалахар, вичи иштирак авур мярекатарни рикIел хкун адаз четин жезвайди за кьатIана.

И. Жигерован аял ва жаван вахтар четин, дар йисарал гьалтна. 14 йисан яшда аваз ада колхозда кIвалахиз башламишна. Играмудина сифтедай колхозда, ахпа Кьасумхуьруьн консервиярдай заводда рабочий яз зегьмет чIугуна.

1959-йисуз дагъви гадади Огнидин профтехучилищеда механизаторвилин пеше къачуна, гьа йисалай “Касумкентский” совхозда вичин пешедай кIвалахна.

— Санлай къачурла, за 43 йисуз совхозда жуьреба-жуьре маркайрин тракторрал кIва­лахна, — лугьузва И.Жигерова. — И йисара за агъзур гектарралди майданра цанар цана, парар дашмишна, багълариз дарманар яна ва маса кIвалахар кьилиз акъудна. Гьикьван лагьайтIани, кIвалахди хъсан нетижаяр арадал гъизвай, бул бегьерар гьасилзавай, ида жувакни ашкъи-гьевес кутадай йисар тир, зегьметди инсандиз шадвални гузвай.

И. Жигерова саки 20 йисуз, комбайнидин рулдихъ ацукьна, райондин майишатрин ни­кIерай гадни агудна. КIвенкIвечи механизатор-комбайнер яз ам гад агудиз Саратовдин, Кустанайдин областризни ракъурнай.

Играмудин Мегьамедалиевича “43 йисуз механизаторвиле кIвалахна” лугьудай гафарихъ гьикьван зегьметар, гьасилай бегьерар, галатIа, адаз ганвай шабагьри ачухдиз ша­гьидвалзава. ИкI, ада 1975-1980-йисара пуд сеферда Москвада кьиле тухвай СССР-дин ВДНХ-да иштиракна, анра кIвенкIвечи механизатор буьруьнждин, гимишдин ва къизилдин медалриз лайихлу хьана. Мадни, алава яз, 1980-йисуз пишкеш яз адаз ВДНХ-да “Москвич-412” маркадин машинни гана.

1981-йисуз И. Жигероваз “Дагъустан Республикадин лайихлу механизатор” лагьай чIе­­хи ва гьуьрметлу тIварни гана.

Са шумуд йисуз кIвенкIвечи механизатор Кьасумхуьруьн ва райондин советрин депутатвиле ва райондин партийный конференцийрин делегатвиле хкяна.

Мадни, зегьметдай вичин бахт жагъай Играмудин Мегьамедалиевичахъ В.И.Ленинан 100 йисан юбилейдин, “Зегьметда тафаватлу хьунай”, “Зегьметдин ветеран”, ЧIехи Гъалибвилин юбилейрин медалар, 9 ва 10-пятилеткайра гъалиб хьайивилин, “Коммунистический зегьметдин зарбачи”, 1974-1980-йисара ганвай “Соцсоревнованида гъалиб хьайиди” знакар, ВДНХ-дин, Дагъустан Республикадин хуьруьн майишатдин минис­терстводин, КПСС-дин райкомдин, “Касумкентский” совхоздин дирекциядин патай ганвай гзаф кьадар дипломар, грамотаяр ава.

Играмудин Мегьамедалиевичан уьмуьрдин юлдаш Бике Шамсудиновнани хуьре-кIвале, районда виридаз мегьрибан дишегьли, кIвалин къул хуьзвай кайвани, зегьметчи инсан яз чида.

— Зани Играмудина 1959-йисуз рикIерни сирер, кьадар-кьисмет сад авуна, — лугьузва Б.Жигеровади. — Жуван уьмуьрдин юлдаш чилин къадир авай, зегьметдал рикI алай инсан хьунал за шадвал ва дамах ийизва. ГьикI лагьайтIа, зани колхозда лап фад кIва­лахиз башламишайди я. Гьа зегьмет себеб­ яз чахъ хъсан кIвал-югъни, чIехид-гъве­чIид чидай веледарни хьана.

Бике Жигеровади “III-Интернационал” колхозда, Кьасумхуьруьн консервиярдай заводда ва “Касумкентский” совхозда саки 46 йисуз намуслудаказ зегьмет чIугуна. Адахъни “Зегьметдин ветеран” медаль ва гзаф кьадар грамотаяр ава.

Играмудин ва Бике Жигеровар чпин ­кьисметдилай рази я, абуруз кьисметдин къадир ава. Гьавиляй абур, Низами Генжевиди ла­гьай­вал, “бахтунинни гьуьрметдин къужахда” ава.

Хазран Кьасумов