Инсандиз виридалайни багьади уьмуьр я. Уьмуьр патал ада зегьметни, женгни чIугвазва. Вучиз ятIани, гзаф вахтара инсандин лайихлувилерикай ам кьейидалай гуьгъуьниз лугьуда. И хъсан кар адал чан аламаз авуртIа жедачни мегер? Гьар са лайихлу касдиз хуш, адаз вичин уьмуьр бадгьафая тефейдакай чир жедайвал.
Вири дуьньядал, кьакь хьиз, алкIанвай тIугъвалди чаз начагъбур къутармишунин карда чи азарханайра, поликлиникайра зегьмет чIугвазвай духтуррин, медсестрайрин, санитаркайрин къайгъударвал, уьтквемвал, викIегьвал къалурна. Чпиз жезвай хатадикайни тIимил фикир ийиз, абур гьар юкъуз, йифиз, сергьят хуьзвай аскерар хьиз, «яру зонада» кIеве гьатнавай инсанрин къуллугъда акъвазнава, жедай вири куьмекар гузва.
Лап четин гьалда аваз больницадиз тухвай чпин багърияр тIугъвалдин къармахрай ахкъуддай духтуррикай редакциядиз кхьизва, абурун тIварцIихъ алхишдин гафар, пешекарвилин буржи вини дережада аваз тамамарзавай ксариз сагърай лугьузва.
Дагъустандин гьукумдин идарайра ва районрин администрацийра чIехи къуллугъар авур Зара Агьмадовна Латифова газет кIелзавай гзафбуруз чида. Ада редакциядихъ галаз датIана алакъаяр хуьзва. И йикъара ада чаз зенг авуна, ЦIийи йис тебрикна ва гьа са вахтунда вичихъ са тIалабунни авайдакай лагьана. Ам ихьтинди тир.
«Мегьарамдхуьре зи талукьар яшамиш жезва. Яшар 80 йисалай алатнавай зи стха Сабир начагъ хьанвайдакай хабар хьана заз. Къанажагълу вири уьмуьр педагогвилиз, акьалтзавай несилдиз чирвилер, тербия гуниз бахш авур стха вичикай масад инжиклу тийиз вердиш хьанвайди я. Зенг авурла, стхади зун секинарна, «са тIимил мекьи хьанвайди я, тумаварар я, алатда абур» лагьана. Са шумуд йикъалай малум хьана хьи, адаз пис жезва. «Тади куьмекдиз» зенг авуна, стха райбольницадиз тухвана. Гьа сифте йикъалай за азарханадин кьилин духтур Беглеров Гьажибала Гьажиевичахъ галаз алакъа хвена. Ада зун гъавурда турвал, стхадин жигерриз (70 процентдилай алатна) тади ганвай. Гьелбетда, за кьилин духтурдивай адаз жедай вири куьмекар гун тIалабна.
Дагъустан Республикадин лайихлу духтур Гьажибала Гьажиевич заз чиз хейлин йисар я. Ада райондин больницада тIугъвалдик азарлубур сагъар хъувун патал лазим вири шартIар тешкилнава. И кардикай азарханадай, сагъ хъжез, эхкъечIзавай инсанрини пара разивилелди лугьузва. Хиве кьада, стхадин гьал гьич хъсанзавачир. Кислороддин аппаратар кутунвай. Сагърай чи духтурар ва медсестраяр, Гьажибала Гьажиевич кьиле аваз. Абуру чи серин жезвай гуьгьуьлар шадар хъувуна. Стха фендигар азардикай хвена. Къе стха Сабир кIвале багърийринни, хтулрин юкьва ава. Чи вири багърийри Гьажибала духтурдиз ва райондин азарханадин коллективдиз рикIин сидкьидай сагърай лугьузва! Абуру, чпел акьалтзавай четинвилериз ва чеб акатзавай хаталувилизни килиг тавуна, гьафтейралди «яру зонадай» экъечI тийиз, азарлуйриз къуллугъзава».
За винидихъ инсандиз виридалайни багьади уьмуьр я лагьанай. Уьмуьрни чаз четин вахтунда халис духтурри багъиш хъийизва. Аллагьди хуьрай чеб!
Нариман Ибрагьимов
