Каспийск шегьердин машгьур “Дагдизель” заводдин Культурадин кIвалин гьаят суварин къайдада безетмишнавай — кьуд патай ранглу баннерарни пайдахар, шарар аквазвай, берекатлу суфраярни ачухнавай. Ина Дагъустандин бадейрин фестивалдин иштиракчияр кьабулзава. Эхь, чаз пара кIани “Бадейрин фестиваль” Каспийск шегьерда кьиле фена. “Россиядин дидеяр” гьерекатдин региондин отделениди тешкилай адетдинди тушир мярекат итижлудаказ кьиле фена ва вичин макьсаддив агакьна. Им “Яшлу каспийсквияр патал тайинарнавай культурадин ва ял ягъунин “Общение” центр. РикIериз чимивал гузвай чка” проект уьмуьрдиз куьчуьрмишунин нетижа я. Бадейрин сувариз шегьердин кьил Мегьамед Абдуллаевани лайихлу фикир гана ва ам Каспийскдин 70 йисаз талукьарна. Тешкиллувилин куьмекар гайибур мадни гзаф я.
Фестиваль ачухунин мярекатда ветеранрин крарай РФ-дин Президентдин патав гвай координационный советдин член К.Мегьамедова, шегьердин кьилин заместитель Л.Левицкаяди, Дагъустан Республикада Вирироссиядин халкьдин фронтдин сопредседатель Т.Рассохинади, РД-дин аскеррин дидейрин комитетдин председатель З.Мегьамедовади, Каспийск шегьерда Пенсионный фондунин управленидин начальникдин заместитель Э.Омаровади, “Яшлубурун ва инвалидрин “Ветеран” тIвар ганвай кIвалин-интернатдин векил А.Дукиевади, Каспийск шегьерда Вирироссиядин буьркьуьбурун обществодин председатель М.Агьмедова иштиракна.
“Россиядин дидеяр” гьерекатдин Дагъустанда авай векил Таиса Мегьамедовади мярекат ачухна.
— “Каспийскдин центральный библиотекадин бинедаллаз “Общение” клуб кардик кваз цIи цIуд йис я. Гьар вацран эхиримжи хемисдиз аниз яшлубур, зегьметдин ва дяведин ветеранар кIватI жезва. Гила чи шегьерда ва санлай республикадани сифте яз яшлубур патал рикIелай тефидай сувар — “Бадейрин фестиваль” кьиле физва. Ам чна сентябрдин вацра кьиле фидай шегьердин юбилейдихъ галаз алакъалу авунва, — малумарна вичин рахунра Т.Мегьамедовади.
Сувар ачухунин мярекатдал чпин фикирар, хуш келимаяр амай мугьманрини лагьана.
“Хоррин бягьс” конкурсда иштиракай виридалайни жегьил артисткадин яшар 70 йисалай алатнавай. Тамашачийри виридаз сад хьтин капар ягъуникди иштиракчияр тир пуд хорни гъалиб хьайибур яз гьисабна. Абурув пишкешарни вахкана.
Фестивалдин сергьятра аваз итижлу серенжемар мадни хьана. Эхирдай бадейрин гуьгьуьлар Дагъустандин эстрададин гъетери шадарна.
Дагъви Шериф
