12-июлдиз, 87 йисан яшда аваз, чи арадай хуьруьн майишатдин производстводин зурба тешкилатчи, алим Багьаудин Расулович Даштемиров акъатна.
Б.Даштемиров 1934-йисуз Докъузпара райондин Гъуьгъванрин хуьре къуллугъчидин хизанда дидедиз хьана. Усугъчайдал юкьван школа акьалтIарна, Дагъустандин хуьруьн майишатдин институтдиз гьахьна ва 1956-йисуз агалкьунралди акьалтIарна. Зегьметдин рехъ хайи хуьруьн колхозда агрономвилелай, ДНИИСХ-да илимдин къуллугъчивилелай башламишна. Гуьгъуьнлай Багьаудин Расуловичакай Мегьарамдхуьруьн райондин “Правда” совхоздин директор, 1983-1989-йисара партиядин райкомдин сад лагьай секретарь хьана. И йисара райондиз кьуд сеферда КПСС-дин ЦК-дин, Министррин Советдин, ВЦСПС-дин ва ВЛКСМ-дин ЦК-дин гъиляй-гъилиз къведай Яру пайдахар гана. КПСС-дин ХХVII съезддин делигатвиле, ДАССР-дин Верховный Советдин депутатвиле хкяна. Ам ДАССР-дин, Россиядин Федерациядин хуьруьн майишатдин лайихлу работник тир. 1991-йисалай гатIунна, хейлин вахтунда агрохимкъуллугъдин “Дагестанский” Федеральный государственный центрадин директорвиле кIвалахна. Хуьруьн майишатдин пешекаррин сихилдай тир Багьаудин Расуловича вич хьайи вири къуллугърал гьакъисагъвилелди зегьмет чIугуна, лайихлу гьуьрмет, авторитет къазанмишна.
“Лезги газетдин” редакциядин коллективди рагьметлудан хизандиз, багърийриз, мукьва-кьилийриз ва вири гъугъванвийриз, дериндай хажалат чIугунивди, башсагълугъвал гузва. Багьаудин Расуловичан экуь къамат чи рикIера гьамишалугъ амукьда.
“Лезги газетдин”
редакциядин коллектив
