КьетIен бажарагъдин иеси
Вичел “Лезги Чехов” тIвар акьалтнавай Дагъустандин халкьдин духтур, яргъал йисара вичикай чи республикада дидейринни балайрин амадаг, абур саламат хуьдай Лукьман хьанвай акушер-гинеколог, илимрин кандидат, ДГМА-дин доцент Азедин Мурадович Эсетован и йикъара 85 йис тамам жезва. Гьелбетда, гьам вич патални, хизандизни, чидайбурузни тебрикриз кутугнавай вакъиа я.
Яшар хьуни инсан кIудда лугьузва. Амма яшари генани жуьрэтлу, камаллу, инсаниятдиз мадни мукьва ва багъри ийизвай ксарни авайди чаз къе чун вичикай рахазвай чIехи духтурдин-алимдин руьгьдин къаматди, къилихди, ада инсанрин хийирлу крарик кутазвай зурба паюни субутзава.
Азедин Мурадович адетдин духтур туш. Адан тIвар кьадайла мадни гзаф лишанлу ибараяр мецел къвезва: гьуьрметлу тамада, гьунарлу суьгьбетчи, вафалу дуст, “къекъвезвай энциклопедия”, писатель ва публицист…
Дагъустандин халкьдин шаир Арбен Къардаша икI лагьанва:
РикIни, мезни, гъилни ачух Азедин духтур!
БицIекринни гьар са бахтлу дидедин духтур!
Халкь рикIевай, халкьдин рикIе авай хва я вун,
Лезгистандин, санлай чIехи уьлкведин духтур!..
Идалайни кутугай къиметар адаз мад гзаф ксари ганва, гилани гузва. Чна абур тикрарзавач. Абурун чIехи пай 2016-йисуз чапдай акъатнавай “Халкьдин духтур” тIвар алай зи ктабда гьатнава.
Амма чи газетда чапзавай “Духтурдин дафтарри” ам мадни кьетIен алакьунрин иеси, вичиз цаварилай художественный такьатралди инсанрин крариз, къаматриз, алакъайриз кутугай къиметар гудай пай ганвайди тирди субутзавачни! Алатай йисуз 2 жуздикай (томдикай) ибарат адан чIехи ктаб “Духтурдин дафтарар” акъатун чи кIелзавайбуру чIехи гьевесдивди кьабулнай, автордиз вичизни хейлин тебрикар рекье тунай. Яратмишдай кIвалах Азедин духтурди-писателди акъвазарнавач. Артухлама, ада вич хъсан кIелзавайди ва чапдай акъатзавай лезги чIалан ктабриз, чи газетда акъатзавай саки вири материалриз къиметар гуз алакьзавай критикни тирди раижзава. Иллаки хайи чIалан хазинадив ам эгечIзавай тегьер чIехи устаддиз ва критикдиз хасди я. Вичивайни, масабурувайни хайи чIалаз гьуьрметун, ам хуьн, виликди тухун, чирун истемишзава.
Адан хизан гзаф миллетрин векилрикай ибаратди я. Амма ана кьилин чIал лезги чIал я! ЧIехи бубадинни рагьметлу баде Мафи Назировнадин хайи чIал…
Чна чи амадагдиз, чIехи духтурдиз — чIехи инсандиз лугьузва:
Ви руьгь сагърай, рикI шад хьурай, ад хьурай.
Зайифвилер, вун акурла, яд хьурай.
Гьар емишдихъ, саз битмишдиз,
Хуш кишмишдин дад хьурай!
Ви зуларихъ, мад тикрар жез,
Ширин, ацIай гад хьурай!
Мердали Жалилов
