Чи уьлкве ислягьвал кIаниди я. Чи халкьарни ислягьвилелди, дуствилелди яшамиш жезва. Чи уьлкведи садрани масабурал­ вегьенач. Амма, Александр Невскийди лагьайвал, вуж чал тур гваз атайтIа, гьам гьа туруник тергни жеда.

СССР-ди дуьньядин халкьар фашизмдикай хвена, азад авуна. Амма чи тарихда гьамиша чахъ мидя уьлквеяр хьана. Чи чилерал, девлетрал пехилбур.

Гьар жуьредин  тапан хиве кьунралди чи мидяйри гьукумдарар алцурарна, алакьарна, СССР чукIурна. Чун гъавурда акьурвал, къуват амачир, чпиз аксивал ийиз тежедай, кьиле зайиф, чпиз табий регьбер авай Урусат я кьван англосаксриз кIанзавайди.

Къе Россия, камаллу, ватанперес, викIегь президент кьиле аваз, метIерилай къарагъна, мягькем камаралди виликди физвайла, душманар пехилвиляй пад жез гатIунна. НАТО чи сергьятриз мукьва хьанва. 2014-йисуз Ев­ромайдан тешкилна, Украина Россиядиз акси дяведин майдандиз элкъуьрна. Гьукумат гужуналди дегишай 2014-йисалай  Украинадин­ миллетбазри Донбассдин агьалияр, шегьерар, хуьрер ракетайрай язава. Фа­шистрин жал­ла­тIар хьайи хаинар Бандерани Шухевич чпин кьегьалар я лугьузвай Украинада миллетбазвал, фашизм кIвачел ахкьалдарна. Чи сергьятдал, чи вилин кIаник НАТО-ди ракетайрин базаяр эцигдай хаталувал арадал гъана.

Гьавиляй тади гьалда 24-февралдилай Россиядин Президент, Верховный Главнокомандующий В.В. Путина дяведин махсус серенжемдив (СВО) гатIунунин къарар кьабул­на. Исятда Россиядихъ галаз НАТО-дик квай ва квачир 50 уьлкведи дяве тухузва. Ук­раи­на­дин миллетбазриз са къатда яракьар­ рекье­ твазва. Имни акI лагьай гаф жезва хьи, махсус серенжем халисан дяведиз элкъвенва.

И дяведа Россиядин вири халкьарин ­векилри иштиракзава. Диде-бубайри, вахарини стхайри, сусарини веледри  чпин бубаяр, стхаяр, веледар, сагъ-саламат яз, гъалиб­ хьа­на хтун вилив хуьзва.

Чи вил алай гъалибвал къазанмишун па­тал зи стхани къизгъин дяведа ава. Ваха стхадин тариф авун са акьван иер аквадай кар туштIани, къе за стхадикай кхьин кутугнава.

Ватандин вири аскерри хьиз, зи стха  ­Хуршидов  Фиридинани  ДНР-дин ва ЛНР-дин халкь миллетбазрин басрухдикай, зу­лумрикай­ азад авун патал женг чIугвазва. Хуршидов Фиридин Саидович 1981-йисан 18-январдиз Ахцегь райондин Ухулрин хуьре ди­дед­из­ хьана. 1987-йисуз ам Мегьарамдхуьруьн райондин ЦIийихуьруьн юкьван школадиз гьахьна ва 1998- йисуз ам акьалтIарна. Мектебда кIел­дай йисара ам датIана хуьруьн спортшколада дзюдодал машгъул хьана. Адахъ и рекьяй хъсан нетижаярни авай. Школа куьтягьай ам ДГПУ-дин лезги ва урус чIала­рин отделенидиз­ (РДО) гьахьна. Гьа са вахтунда ада Каспийск шегьердин военный кафедрадани кIелна, офицервилин (лейтенант) чин къачуна. 2003-йисуз университет вадралди акьалтIарна.

2004-йисан 10-майдилай ам армиядин жергейриз, ватандиз къуллугъ ийиз фена. Алай вахтунда майор Хуршидов вичи къуллугъзавай 150-мотострелковый дивизиондин, танкарин 68-полкунин командирдин заместитель я.

Ада къуллугъзавай частуна чи хуьряй, райондай, Дагъустандай хейлинбур ава. Мукьвара отпускдиз хтай адан женгинин са юлдашди хабар гайивал, Мариуполь, Лисичанск ва маса шегьерарни хуьрер азад хъийидай женгера подразделениди къалурай тафаватлувилерай са жерге аскерриз ва офицерриз гьукуматдин шабагьар ганва. Абурукай яз, майор Фиридин  Хуршидов “Женгера тафаватлу хьунай” медалдиз лайихлу хьана. И кардал чна дамахзава.

Мумкинвал хьанмазди, Фиридин стха  ди-дедихъ, бубадихъ хизандихъ, аялрихъ га­лаз­ рахазва. Гьикьван четинзаватIани, ада жаваб  гу­да: “Вири хъсанзава. Сагъ-саламат я! Килиг­ гьа, диде сефилармир!” — тагькимарзава ада.

Стхадин рикI лезги эдебиятдал, медениятдал алайди я. И цIарар авай “ЛГ”-дин нумра­ни адал агакьда. Гьавиляй заз лугьуз кIан­за­ва: Ватан хуьзвай, чи  ислягьвилин къаравулда акъвазнавай играми стха, баркалла ваз ва женгинин вири юлдашриз! Куь къуллугъ четинди, амма Ватан, халкь патал лап герек­ди я. Ватанэгьлийрин ислягьвал патал куьне, че­тинвилерни татугайвилер алудиз, гъалибвилихъ ялзава. Чун чIулав ниятар авай душман­рикай гележегдани хуьн патал чалишмишвалзава. Россиядихъ викIегь, кьегьал аскерар, къу­ватлу армия виридалайни еримлу, яракьлу къуватар авайди вирибуруз субутзава. Куьне чIуг­вазвай женг адалатдинди, гьахълувилинди я. Гьавиляй куь рехъни гъалибвилинди же­дайдахъ чун агъунва. Аллагьди хуьрай куьн!

Тамила Салманова