29-майдиз Дагъустан Республикадин Кьил Сергей Меликова йикъан месэлайрай нубатдин совещание кьиле тухвана. Мярекатдал ихтилат гатуз аялри ял ягъун тешкилуникай, республикада туризмдин вахт кечирмишзавай гьалдикай ва Дагъустанди Россиядин Федерациядин государстводин программайра иштиракуникай фена.
Аялар хуьнин международный йикъан сергьятра аваз, герек мярекатар тешкилуникай рахуналди, региондин Кьили лагьана: «1-июндиз республикада аялрин 6 бахча ачухда. Махачкъала, Буйнакск, Хасавюрт шегьеррин, гьакIни Буйнакский, Хасавюрт районрин бязи хуьрерин аялри шаддиз бахчайриз камар къачуда. ЦIи и сувар чна вири муниципалитетра гегьеншдиз тухун лазим я. Аялриз, иллаки военный махсус серенжемда иштиракзавайбурун веледриз, етимриз, сагъламсузвал себеб яз, мумкинвилер тIимил тир, больницайра сагъар хъийизвай, гзаф аялар авай хизанрин аялриз чна шадвал багъишун герек я. Муьгьтежбуруз дикъетни гана кIанда», — лагьана региондин Кьили
Аялар хуьнин юкъуз кьиле тухудай мярекатрикай РД-дин Кьилин ва Гьукуматдин Администрациядин руководитель Алексей Гьасанова суьгьбетна.
Россиядин Федерациядин государстводин программайра Дагъустанди иштиракзавай гьалдикай РД-дин Гьукуматдин Председателдин сад лагьай заместитель Руслан Алиева лагьана.
Гъилевай йисуз республикади государстводин 49 программадикай 33-да иштиракзава. Хъсан кар ам я хьи, 11-госпрограммадиз ахъайзавай такьатар артухарнава. Абур агьалийриз яшайишдин рекьяй куьмек гунин, транспортдин къурулушар, хуьрерин мулкар, хуьруьн майишат вилик тухунин, хуьруьн майишатдин суьрсет маса гузвай базарра къайда тунин ва оборонадинни промышленностдин комплексдин программаяр я.
Гьа са вахтунда цIи туризм, энергетика, промышленность, гимияр туькIуьрдай, илимдинни технологиядин хилер, элкъуьрна кьунвай тIебиат хуьниз талукь къурулуш вилик тухуниз талукь программаяр патални пулдин такьатар артухарда.
Совещанидал гатуз аялри ял ягъун тешкилзавай гьални веревирдна. Ам межведомственный махсус комиссиядин гуьзчивилик кваз кьиле физва. Шегьеррин къерехра авай вири лагерар аялар кьабулуниз гьазур я.
Гъилевай йисуз аялрин сагъламвал мягькемардай, абуру ял ядай 199 лагерь ава. Абурукай 25 шегьеррин къерехра авайбур я. 5-июндиз аялрин лагерри чпин ракIарар ачухда. Виликамаз тайинарнавайвал, гатун варцара лагерра 34 агъзур аялди ял яда, чпин сагъламвал мягькемарда.
Мярекатдал лагьайвал, къенин йикъалди аялриз пулсуз гузвай вири путевкаяр къачунва. Школайрин къваларив ачухнавай лагерра ял ядайбуруз тIуьн-хъун тешкилун патал герек вири такьатар чкайрал агакьарнава.
«Военный махсус серенжемда иштиракзавайбурун аялриз куьмек гунин мураддалди республикадин образованидин «Солнечный берег» центрада 550 аялди ял яда. Идалай гъейри, Дагъустандин лагерра Россиядик экечI хъувунвай цIийи мулкарай, Сириядин Арабрин Республикадай къвезвай аялрини ял яда. Абуру чпиз ина урус чIални чирда», — малумарна вице-премьер Муслим Телякавова.
Набут ва, сагъламсузвал себеб яз, тIимил мумкинвилер авай аялар патал махсус программа туькIуьрнава.
Муниципалитетри школайрин къваларив тешкилнавай лагерра ял ягъун, республикадин шегьерриз, хуьрериз экскурсияр авун ва гьуьлел фин патал чкадин бюджетрай 37 миллион манат чара ийидайвал я.
Дагъустанда туризмдин сезондив эгечIнавай гьалдикай и хилен министр Эмин Мерданова хабар гана. Ада лагьайвал, шегьеррин, хуьрерин муниципалитетрихъ галаз туристрин дестеяр физвай чкайра михьивал хуьн патал саналди тир кIвалах тухузва. И кардик вири районрин администрацияр экечIнава, абуру туризмдин объектар авай гьалдикай хабарни гузва.
Туристар гзафни-гзаф физвай Гуниб, Буйнакский, Казбек, Дербент районра ва Махачкъала, Дербент шегьерра санитариядин гьалар хъсанарун патал гьар йикъан кIвалах тухузва. Министрди къейд авурвал, туристар гзаф къвезвайвиляй и месэладиз гьар юкъуз фикир гун лазим я.
Эхирдай Сергей Меликова къайдаяр хуьдай органри, Роспотребнадзордин векиларни галаз, туризмдихъ галаз алакъалу чкайрал датIана гуьзчивал авуна кIанзавайдакай лагьана. Совещанидин кIвалахдикай гегьеншдиз РД-дин Кьилин сайтдай кIелиз жеда.
Хийир Эмиров
